Iván Ferreiro foi o gran protagonista do día grande do Atlantic Fest
22 jul 2018 . Actualizado ás 05:00 h.O Atlantic Fest celebrou o seu día máis grande cunha intensa xornada musical cargada de convivencia e sensibilización. Un ano máis, a súa proposta multicultural e para todas as idades volve demostrar que as familias tamén teñen cabida nos festivais. Cun recinto máis amplo que en anteriores edicións, unha boa distribución do espazo e uns horarios máis diúrnos que nocturnos, todos os asistentes puideron gozar dunha cita ineludible na Illa de Arousa, un lugar idílico para este tipo de grandes eventos.
Desde as doce e media da mañá, a música non deixou de soar na praia do Bao. O pistoletazo de saída deuno o grupo electrónico Presumido, ao que seguiu Iván Ferreiro, amo e señor do territorio indie. Xa pola tarde, ao redor das catro, fóronse sucedendo no escenario principal artistas de distintos xéneros. Desde o folclórico Rodrigo Amarante ata o grupo indie británico Kaiser Chief, pasando polo trapero Yung Beef e o clásico grupo dos noventa, A Casa Azul.
Por outra banda, no recinto habilitáronse casetas de concienciación sobre diversos temas como a igualdade de xénero e os abusos sexuais, o coidado ambiental e a normalización lingüística do galego en todos os ámbitos. En definitiva, o Atlantic Fest volveu demostrar que é algo máis que un festival de música .