A veterinaria Candy Rodríguez impartiu unha charla o sábado pasado na parroquia carballesa de Cances
17 abr 2018 . Actualizado ás 05:00 h.A procura de liderado, cohesión de equipos, mellora da comunicación, confianza, empatía, xestión de emocións... Todo isto ensina o coaching con cabalos, unha das tácticas máis apaixonantes e rápidas de adquirir habilidades para chegar a ser líder, que empezou como un método para empresas e que agora se desenvolve, tamén, a nivel persoal. A veterinaria e especialista en doma natural, Candy Rodríguez (1970, Vigo), é unha das pioneiras da súa posta en práctica en Galicia.
-De onde vén o «coaching» asistido con cabalos?
-É unha metodoloxía innovadora de adestramento herdada dos Estados Unidos. Empezou como unha fórmula para as empresas, pero agora desenvólvese tamén a nivel persoal. É máis habitual noutras comunidades e non tanto aquí en Galicia.
-En que consisten estes adestramentos?
-O cabalo, a través da súa capacidade para captar todo o que o rodea, percibe tamén o noso estado emocional a través da linguaxe non verbal que transmitimos. A partir de aí, o animal actúa como espello de nós mesmos, o que proporciona un feedback [retorno] inmediato e obxectivo. Esa retroalimentación chéganos sen xuízos, polo que todo o que recibimos do cabalo é información que nos serve para facer un pouco de autoconocimiento. E a todo este proxecto habería que sumarlle a axuda do coaching, que neste caso son eu.
-Os cabalos poden entón ofrecer a mesma compresión que as persoas?
-Claro. O fundamental deste tipo de método é que a persoa se pode mostrar tal cal é. Ninguén a vai a xulgar. Recoñecerase e reflexionará moito antes que o faría nunha sesión de adestramento normal. É máis, seguramente ese suxeito saque máis rápido nunha sesión deste tipo ese algo que tanto lle custa manifestar.
-Que beneficios achega esta táctica?
-Eu diría que o primordial proveito xa é estar nunha contorna natural, o que relaxa moito. Os talleres con cabalos non van con reloxo. Non se trata de conseguir o obxectivo, senón de atopar o camiño para conseguilo. Por isto, permite coñecerse a un mesmo, conseguir desbloquear de situacións nas que moitas veces estamos perdidos ou mellorar a nosa autoestima e autocuidado. E se referímonos ao ámbito empresarial, mellora a capacidade de liderado, a comunicación, así como o traballo en equipo.
-Cal é a orixe da conexión entre o cabalo e o home?
-Vén de cinco mil anos atrás, un dato que sempre me gusta recalcar porque este é o animal, despois do can, que leva máis tempo domesticado. Debémoslle moito porque o utilizamos para as guerras, conquistar territorios, acceder a novos lugares, a agricultura, etcétera. Despois de todos eses anos de domesticación, ademais de ser animais sociais son animais de manda, que aprenderon a desenvolver fórmulas para comunicarse entre eles, e tamén coas persoas. Só fai falta saber escoitalos.
-Todos os cabalos son aptos, ou poden selo, para este método de adestramento?
-Si, aínda que eu creo que non son aptos os que non sobreviven en condicións ideais. Con isto refírome a vivir en grupo xunto a outros cabalos, en semiliberdade no posible, en calma e cos recursos necesarios para saír adiante. Estes animais necesitan estar moi espertos e equilibrados.
-Este é un proceso de adestramento no que participan mesmo nenos.
-Si, aquí hai que diferenciar entre a equinoterapia destinada a persoas con necesidades especiais, e as intervencións asistidas con animais nas que entra o coaching. E si, eu fago tanto adestramento para adultos, nenos ou adolescentes. Calquera persoa que teña interese, curiosidade ou ganas de desenvolverse persoalmente é apta.