Acórdasche do bañador vermello co que salvaban vidas correndo a cámara lenta as «Vixiantes da praia»? Pois é tendencia. Coidado, Pam, saíuche competencia.
10 jun 2017 . Actualizado ás 10:33 h.Os Vixiantes da praia calaron fondo nos 90. Eu mesma xogaba de pequena a correr fronte ao Atlántico como o facían os mozos do equipo de Mitch Buchannon por Santa Mónica. Aínda que nese momento o que máis me gustaba era o seu salvavidas con cordel anudado ao peito. Agora os Vixiantes da praia volven estar de moda. E non me refiro ao seu regreso en forma de película, senón ao efecto Pamela Anderson na moda de baño: bañadores de tiro moi alto, para presumir de ínguas; co escote lateral moi pronunciado, bautizado co nome de «side boob», e, como non, de cor vermella. A moza loura de Malibú marcou unha época. E as tendas reviven o seu momento baywatch coma unha bala.
Os best sellers
O caso máis claro deste revival de praia, o de Zara, que esgotou un bañador idéntico ao das socorristas da serie de televisión antes, mesmo, de que en Galicia se puidese ir á praia. Agora o seu irmán de cor amarela, unha especie de segundo equipamento para as máis cool, vai polo mesmo camiño.
Hainos máis discretos, que simplemente se inspiran na cor do mítico bañador de Pamela Anderson, como os de For Love and Lemons ou a colección de amp; Other &Stories. Sexa como sexa, é máis que probable que este verán acabes na praia vestida de vermello.
