O futbolista xa adestraba a pasada tempada cos de Loimil
27 jul 2017 . Actualizado ás 05:00 h.O Estudantil acaba de incorporar a un novo futbolista de ataque. Trátase de Alberto, xogador de 19 anos e que a pasada tempada xogaba en División de Honra Xuvenil co Areosa. Pero non se trata dun descoñecido no club de Loimil. O ano pasado acudía a adestrar unha vez á semana cos estradenses xa que estuda en Santiago. Alberto desenvólvese como dianteiro centro, aínda que tamén pode facelo de extremo pola esquerda.
Alberto aseguraba onte que non se pensou moito a oferta recibida polo Estudantil. Ao estudar en Santiago queda preto para adestrar e busca ademais un revulsivo na súa carreira futbolística, ao ter poucos minutos na pasada tempada co Areosa. «Ao adestrar un día menos co grupo o técnico non contaba tanto comigo e non xogaba de titular, adoitaba ter vinte ou vinte e cinco minutos por partido», explicaba o mozo dianteiro. Ese menor protagonismo supúxolle tamén baixar a súa media de goles e só conseguía tres dianas.
O futbolista natural de Vigo mostrouse encantado coa súa fichaxe polo Estudantil ao coñecer a Gelucho, destacando os adestramentos baixo as ordes do seu novo adestrador. Ademais, a pesar da importante renovación do persoal para a tempada 2017-2018, tamén compartiu adestramentos con algúns dos seus novos compañeiros, o que agarda que facilite a súa integración. Asegura a súa intención de pelexar por contar con máis minutos e mesmo gañarse a titularidade.
Desde o club, o seu presidente, Arturo Fandiño, incidía onte en que aínda resta algunha incorporación máis ao persoal. Entre os nomes que se barallan figuran futbolistas coñecidos como Iván Orosa, Ayaso ou Kopa. Directiva e técnico avalían os seus perfís para decidir aquel que pode interesar máis á entidade de Loimil para reforzar algún posto. Están a axilizarse as negociacións para pechar esta semana as fichaxes e iniciar a pretemporada o vindeiro luns.