A venda de animais enfermos tamén implicará o pagamento das sancións máis altas
27 abr 2017 . Actualizado ás 05:00 h.A falta de que a burocracia esgote os prazos fixados (30 días de exposición pública para alegacións, resolución das mesmas, aprobación definitiva e publicación), os veciños de Vigo que teñan baixo a súa tutela cans das razas catalogadas como potencialmente perigosas e decidan abandonalos na vía pública corren o risco de pagar unha multa que podería acadar os 30.000 euros. Esta é a nova contía das sancións moi graves que aparece recollida na modificación da ordenanza municipal para a protección e tenencia de animais, que foi aprobada en pleno onte de forma inicial cos votos favorables do equipo de goberno e da Marea. O PP abstívose.
O novo valor das infraccións aumentará considerablemente, xa que o importe desas infraccións graves, mentres non entre en vigor o novo documento, está fixada en 15.025 euros. Na mesma ordenanza, ademais de citarse o abandono na rúa de canes perigosos, inclúense outras posibles infraccións, como os malos tratos de animais que cause a morte, a organización e realización de espectáculos, pelexas ou outras actividades con animais que impliquen crueldade ou poidan ocasionarlles sufrimentos.
A venda de exemplares con enfermidade infectocontagiosa coñecida, para experimentación sen a debida autorización ou en centros desautorizados tamén implicará o abono de 30.000 euros. Aclara a ordenanza que as faltas moi graves implican sempre reiteración nun período inferior aos 365 días tras a notificación da última multa. O mesmo documento inclúe unha epígrafe dedicada aos xa citados cans que pertencen a razas perigosas. Entre as accións vetadas de forma drástica figura posuír un exemplar sen licenza e o chip identificador, vender ou transmitir de calquera forma un exemplar a unha segunda persoa que careza de licenza obrigatoria, adestralos para activar a súa agresividade ou para finalidades prohibidas ou adestralos se se carece do certificado de capacitación. A organización ou celebración de concursos, exercicios, exhibicións ou espectáculos destes animais potencialmente perigosos tamén está prohibido e implica unha sanción máxima de 30.000 euros. As graves, por exemplo, eran de 300 a 2.404 e agora de 501 a 500.
Infraccións leves
Entre os motivos recolleitos na ordenanza para tramitar sancións leves (cun importe que ata agora ía de 150 a 300 euros, e agora son de 100 a 500) figura non manter ao animal en boas condicións sanitarias, o emprego de exemplares en traballos que os inmobilicen e provoque dor, exercer a venda ambulante de calquera animal fóra dos mercados autorizados, o sacrificio en lugares públicos ou a non recollida inmediata de excrementos.
Os canes violentos seguirán vetados nas praias, ao contrario que o resto de razas
A modificación da ordenanza para a protección e tenencia de animais volve pór sobre a mesa unha antiga pretensión dos usuarios, que busca desde hai tempo, pero sen concretarse ata o momento, a habilitación dun areal para que, nos meses de verán, os donos de cans -que non sexan potencialmente perigosos- dispoñan dun espazo nalgún areal para gozar das súas mascotas. A variación aprobada onte recoñece a vontade do executivo de habilitar algún enclave, aínda que por agora se descoñece cal será. Da mesma forma que lembra que os cans perigosos, ademais de ter prohibido o acceso, teñen a obrigación de levar posto unha boceira e ir suxeitos con correa sempre que transiten por calquera vía pública.
Dardos cruzados
O PP, durante o debate plenario de onte pola mañá, alegou que a súa decisión de absterse débese a que aínda teñen que presentar alegacións para mellorar a citada modificación, e que, en consecuencia, agárdase do goberno de Abel Caballero que, polo menos, teña a ben valoralas co ánimo de mellorar o texto vixente. Aínda así, o edil Diego Gago, que exerceu de portavoz neste punto da orde do día, lembrou ao grupo socialista que, como non axilice os prazos, poida que no verán que está ao virar a esquina os vigueses con can queden, un ano máis, sen un areal para gozar coas súas mascotas. A réplica socialista non tardou en chegar e foi contundente: «Si chegaremos a tempo para o verán, non se preocupen».