As mínimas serán baixas en xeral, xa que só en Vigo e A Coruña chegarase aos 7 graos
26 abr 2017 . Actualizado ás 05:00 h.Hoxe será un día frío no interior de Galicia, especialmente en Lugo, onde os termómetros oscilarán entre os 4 e os 11 graos. As mínimas serán baixas en xeral, xa que só en Vigo e A Coruña chegarase aos 7 graos. Ao mediodía non se pasará dos 15 graos, con máximas de 13 na Coruña e Santiago. O problema é o aire frío e húmido que chega do norte e que na costa atlántica farase máis molesto polos ventos do nordeste, que aínda sendo moderados en xeral poderán ter intervalos fortes.
A todo o anterior hai que sumar ceos escuros, con nubes compactas e mesmo algún que outro chuvasco no norte pola mañá. A partir do mediodía a situación xeral mellorará, aínda que nas próximas xornadas o frío nocturno non abandonará Galicia.
Mañá a comunidade quedará baixo a influencia de altas presións que estarán localizadas ao oeste de Irlanda e por iso agárdanse ceos pouco nubrados ou mesmo despexados, só con intervalos de nubes durante a mañá na Mariña. Con todo, e aínda que as temperaturas máximas subirán lixeiramente -un par de graos con respecto a hoxe- as mínimas seguirán sendo baixas. Haberá xeadas débiles nalgunhas comarcas, e en Lugo rexistrarase unha mínima de 1 grao. No resto haberá variacións entre os 3 e 4 graos pola noite.
O venres repetirase a situación: frío pola noite e temperaturas tépedas ao mediodía, e de feito está previsto que Ourense, Pontevedra e Vigo superen lose 20 graos de máxima. A metade norte de Galicia terá que conformarse con 18 graos no mellor momento do día. Na costa do terzo norte seguirá soprando vento do nordeste, aínda que de forma moderada.