Mergulladores das Rías Baixas colaboran co CSIC para detectar peixes exóticos
VIGO CIDADE
Os investigadores aprecian unha presenza cada vez maior de especies doutras latitudes
23 abr 2017 . Actualizado ás 04:00 h.«Cada vez están a aparecer especies máis raras». A sentenza é de Ricardo González, innumerables veces campión galego de pesca submarina e integrante da selección nacional. El, que practicamente se mergulla todos os días nas augas das Rías Baixas, sabe moi ben do que está a falar.
O xurelo dentón, por exemplo, unha especie tropical, é xa un morador moi habitual das augas das costas do sur de Galicia. Ricardo forma parte do club A Raspa, que recentemente mandou aos seus socios una circular para que colaboren co CSIC á hora de atopar diferentes especies exóticas.
Rafael Bañón, que leva dúas décadas rexistrando, catalogando e publicando a presenza de peces tropicais en Galicia, ten moi claro que a colaboración de quen máis tempo pasan baixo as augas é fundamental para ter un mellor control das cada vez máis grandes poboacións de intrusos. «É un fenómeno que está documentado en todo o mundo. As especies vanse desprazando cara ao norte en busca de augas menos cálidas», explica. Buscan o lugar máis adecuado para o seu punto de temperatura.
Proceso lento
O proceso é lento, pero imparable. A relación é ampla: o jurelo dentón xa relatado, o azul, a corneta colorada, o peixe globo, unha anguía de fondo subtropical... Desde que en 1996 comezou o seguimento da aparición de especies novas ou pouco coñecidas documentáronse ao redor de douscentos rexistros dunhas cincuenta especies diferentes de peces.
A intención do Instituto de Investigacións Mariñas de Vigo é potenciar a procura e para iso estase solicitando a colaboración dos mergulladores deportivos e tamén das confrarías. As instrucións son claras: se aparece algún peixe raro hai que intentar conservalo ben, en xeo ou meténdoo nun frigorífico, e a continuación pórse en contacto con Rafa Bañón. Ben por teléfono (986 492 111) ou ben por correo electrónico na dirección anagoplaster\
En calquera caso, e para evitar calquera tipo de alarma inxustificada, convén resaltar que as especies que polo momento están a aparecer nas augas das rías galegas, aínda que invasoras, non son perigosas para a fauna local. Consumen o mesmo alimento que os nativos, certo é, pero se algo ten as Rías Baixas é capacidade para alimentar a unha cantidade inxente de especies. Mesmo poden chegar a converterse nun recurso máis. É o que sucede por exemplo co peixe ballesta, cuxa primeira presenza se documentou a mediados do século pasado en Galicia e que agora xa aparece con asiduidade nas lonxas.
Sen problemas
Os turistas das augas non producen, polo tanto, maiores problemas. Ricardo González chegou a ver ata algún mero mediterráneo.
O peixe limón xa é un coñecido máis, asegura o investigador. Ao principio pescábanos por ser unha novidade, pero agora, «velos pasar e xa nin os colles», conclúe.