O festival ofrece esta tarde doce películas, dentro da sección de concurso, no salón de actos do Marco
24 may 2016 . Actualizado ás 04:00 h.O Festival Primavera do Cine en Vigo ofrece esta tarde, no Marco, tres bloques de curtametraxes galegas. Na primeira entrega poderanse ver as películas Estraño, de Julián Maguna; Onde caen as follas, de Alicia Albares; Espazo, Anxo Filgueira; e Narci, de Julián Maguna.
Ás 18.15 horas comezará o segundo bloque que está composto por Freedom to Kill the Other?s Children, de David Varela; Sobre a morte de Bieito, de Xudit Casas; Ferrol mola, de Cristina Esteiro e Carlos A. Quirós; e Unary, de Luis Avilés Barqueiro.
Ás 19.40 horas exhibiranse Vainilla, de Juan Beiro; Quinta provincia, de Lucía Estévez; A liña política, de Santos Díaz; e Cando eu me morra, de Pablo Martínez.
O Festival Primavera do Cine contará mañá mércores coa presenza do prestixioso historiador do cine Julio Pérez Perucha. Este experto de cinematografía participará no festival pola tarde na retrospectiva que o festival dedica ao actor galego Estévez Piña. Esta homenaxe terá lugar no auditorio municipal a partir das sete e media da tarde de mañá.