Porriño, Guardés e outros seis equipos inician mañá a loita polo primeiro gran título do ano
29 abr 2017 . Actualizado ás 16:38 h.Di Joaquín Rocamora, adestrador do Elxe, que a Copa da Reina é «a gran festa do balonmán feminino español». Un evento capaz de reunir durante tres días no Porriño á flor e nata da disciplina e que todos os anos garante sorpresas e emocións. Mañá, cando no pavillón porriñés arranque a competición, todo será posible. Granollers-Guardés (13.30 horas), Bera Bera-Elxe (16h), Rocasa-Málaga (18.15h) e Alcobendas-Porriño (20.30h) serán os protagonistas nos cuartos. Os adestradores analizan o torneo para La Voz.
abel estévez (porriño)
As anfitrioas, motivadas
«Dende decembro a planificación estivo destinada a chegar ben á Copa», confesa Abel Estévez, que considera que o papel de anfitrioas do Porriño pode «darnos un plus de motivación para pasar a primeira eliminatoria. Ademais, non tes o desgaste da viaxe e o feito de estar arroupado pola túa xente, sempre é un plus». Bera-Bera, Rocasa e Guardés son os equipos aos que ve con máis opcións, e das veciñas lembra que chegan «nun momento moi bo na liga que lles aportou moita confianza». O Alcobendas será o primeiro rival das de Abel -que non poderán contar con Iris- e o técnico agarda máxima esixencia. «É un equipo con moita experiencia nestas competición e se non teñen mellor posición ligueira, é polas lesións. Agora recuperan xente e vai ser un rival que nos vai esixir moitísimo», alerta Abel.
j. i. prades (guardés)
A ilusión por bandeira
Todos os adestradores coinciden: leste está sendo o ano do Guardés. O equipo de Juan Ignacio Prades está vivindo o momento máis doce da súa historia. Colidera a liga tras vencer ao Bera Bera e moitos lle dan como claro favorito na Copa. «Cando feixes bos números a xente talvez che respecta máis, pero nós fuximos de etiquetas, non é bo que che regalen os oídos e por iso creemos que non hai favoritos. É certo que agora mesmo o equipo está a funcionar ben, demostra ter madurez e intentaremos aproveitar o noso bo momento», razoa o técnico, que proclama a ilusión do grupo. Con todo o equipo dispoñible, Prades quere ir paso a paso e o primeiro será superar a un Granollers «durísimo e que xoga moi ben ao balonmán, independentemente do que diga a táboa, compite de ti a ti con calquera» e esixiralles o máximo.
antonio moreno (rocasa)
A un partido, todo aberto
Rocasa está vivindo unha tempada máis complexa que as anteriores. «Tivemos altibaixos, tras cinco anos xuntos sufrimos baixas importantes, aínda que nos vexo ben», detalla Antonio Moreno, un técnico que ten moi claro que na Copa da Reina os carteis de favoritos non serven de nada. «A un partido non hai ningún tipo de favoritos, nós perdemos en liga con Málaga. Aquí hai que ir sen medo ningún, pero con respecto a todos», lembra. Sobre os dous galegos, Moreno destaca das anfitrioas que «demostraron que poden gañar a calquera, e Guardés está no seu ano. Está a saírlle todo e levan moitos partidos sen perder. Están coa moral moi arriba, e nestes torneos é moi, moi importante», explica o técnico canario.
diego carrasco (málaga)
Mellorar a edición anterior
«Por tradición, Bera Bera e Rocasa sempre foron habituais nas finais, pero hoxe en día pode haber sorpresas en calquera partido», sostén o adestrador do Málaga. Diego Carrasco admite que «polo que se deu na última xornada, gañar Guardés ao Bera Bera, dá sensación de que está nun momento bo. Porriño non tivo boas xornadas anteriores, pero é o anfitrión e como tal, conta cunha motivación extra». Sobre o reto do seu equipo, Diego subliña que o primeiro é mellorar a imaxe ofrecida na anterior edición do torneo. «Chegamos con boas sensacións, o ano pasado non demos boa imaxe contra Zuazo, así que queremos mellorala. Sabemos que Rocasa manéxase moi ben nesta competición, pero non imos renunciar a nada».
joaquín rocamora (elche)
Todos a por todo
A quiniela de Joaquín Rocamora ten marcados a Guardés e Bera Bera como favoritos. «Guardés, polo momento no que chega. Acaba de vencer a Rocasa e Bera Bera, e as donostiarras, por tradición e por empaquetado de persoal, aínda que teña as baixas que ten». O técnico, en todo caso, tamén considera que «a partido único todo pode pasar, e en case todas as copas se dá unha sorpresa, e este ano gustaríanos ser nós». Ao ser cuestionado polos equipos galegos, Rocamora subliña que «Porriño é un equipo realmente ben traballado e distinto aos demais da Liga porque utiliza ás 15 ou 16 xogadoras e iso fai que todas se sintan importantes. Logo, Guardés é un equipo feito a talonario, logrou fichar a xogadoras determinantes como Mendoza ou Sempere e conservou a Haridian, ou Inés Hernández. É un elenco de estrelas que fai que teñan opcións a gañar todo».
j.l. villanueva (granollers)
Abertos ás sorpresa
Destaca José Luis Villanueva que a Copa «é unha competición diferente, sempre ofrece agradables sorpresas, pero Guardés ou Bera Bera, aínda que intenten quitarse esa bitola, son os que deben soportar a presión. O resto imos intentar darlle á Copa ese grao de sorpresa que sempre ten». O técnico do Granollers non cre que as dinámica pesen. «Fun crítico con quen di que algúns equipos imos de comparsas; unha cousa é ter unha clasificación diferente e outra que a calidade non che permita raiar a gran nivel». A eles tócalles verse as caras coas da Sangriña e aspiran a «manter a nosa filosofía de xogo, ser firmes 60 minutos, achegar todo o experimentado e por suposto clasificarnos». Sobre os galegos, Villanueva teno claro. «O Guardés está facendo unha tempada excepcional; José Ignacio está a explotar ao máximo un grupo moi bo, nótase a súa man. Do Porriño, o mesmo. Creo que fixo tempada excepcional cos recursos que ten, fixo tres cuartos de liga brutais».