A atacante, de 25 anos, procede do Santa Teresa , co que disputado as dúas últimas tempadas
14 jun 2017 . Actualizado ás 13:53 h.O Deportivo pechou para o seu equipo feminino, o Deportivo Abanca, a fichaxe da atacante vasca Ainize Barea, 'Peke', que procede do Santa Teresa CD, co que disputou a Liga Iberdrola as dúas últimas tempadas, informou o club galego.
Peke, que cumpriu en xaneiro 25 anos, é a segunda incorporación do Deportivo Abanca para a tempada 2017-18, na que o conxunto branquiazul tratará de ascender á máxima categoría. O Deportivo defínea como «unha xogadora rápida e polivalente, que pode actuar en calquera das posicións de ataque».
Co Santa Teresa CD de Badaxoz, Peke quedou undécima e novena nas últimas tempadas na Liga Iberdrola. O club coruñés indica que a futbolista vasca empezou xogando ao fútbol sala aos 6 anos, ata que aos 12 deu o salto ao campo grande co CD Ugao, ao que pertenceu ata que fichou polo equipo pacense, co que conquistou dúas veces a Copa de Estremadura.
Con Peke son 16 as xogadoras coas que conta o Deportivo Abanca: Anita, Estefi, Miriam, María Corral , Nuria, Raquel, Tere Abelleira, Cris, Lea, Malena, Faragulla, Gere, Silvia Mérida e as venezolanas Kika Moreno e Gaby García.