É moi importante para o Deportivo o ascenso do Fabril, porque, aínda que a Terceira galega se destaca como unha das máis potentes e obriga aos mozos a competir, a Segunda B non deixa de ser unha categoría semiprofesional e han de ofrecer un rendemento aínda maior. A tempada que vén o Fabril poderá enfrontarse ao Racing de Santander (se non sobe), o Racing de Ferrol, o Pontevedra, ou a Ponferradina, que dispoñen de persoais practicamente profesionais e que suporán que a formación dos canteiráns na competición vai ser máis importante.
A filosofía dos filiais está a cambiar. Antes, nos equipos xuvenís había unha criba, os elixidos daban o salto ao filial, aí pasábanse un par de anos e, se non chegaban ao primeiro equipo, tiñan que saír. Agora, coa repartición dos dereitos televisivos, a Segunda, de aquí a poucos anos, estará infestada de filiais. Vai ser moi goloso para os equipos de Primeira dispor dun equipo nunha división inmediatamente inferior con xogadores a proba, pero máis feitos de cara a acadar algún día o primeiro persoal. Isto vai cambiar por completo a configuración da categoría de prata, onde agora só milita un filial, o Sevilla Atlético.
Agora mesmo os filiais contan con futbolistas con idades maiores ás de hai uns anos. Por exemplo, o Celta B tiña un goleador como Borja Iglesias cun soldo case de Primeira División, non dun filial, porque xoga nun club moi interesado en que subise de categoría. O propio Dépor B tampouco era un equipo ao uso, pois tiña a futbolistas como Monsalve, con máis experiencia e fortaleza para buscar o ascenso. E estes casos non son nin sequera equiparables aos dos filiais do Barcelona e o Madrid, que xa non se poden considerar de canteira. Na Youth League da UEFA vías a un Madrid de estranxeiros e profesionais, mentres no Barça B xogaba un central que coñecen na Coruña: Borja López, que militou no Dépor na tempada 14-15, con Víctor Fernández e Víctor Sánchez.