As estrelas son branco de centenares de obxectivos de fotógrafos e cámaras de televisión nos 24 chanzos que levan ao Palacio de Festivais no mundialmente famoso bulevar da Croisette
23 may 2015 . Actualizado ás 05:00 h.As estrelas apostan polos vestidos longos, as transparencias e as cores branco e negro cando teñen que desfilar pola alfombra vermella de Cannes, un estilo clásico e «cada vez máis estandarizado». «Cannes non é un festival de moda», explicou Nathalie Rozborski, consultora de moda e de beleza na oficina de tendencias Nelly Rodi. A pesar diso, nos 24 chanzos que levan ao Palacio de Festivais no mundialmente famoso bulevar da Croisette, cubertos por 60 metros de alfombra vermella que se cambia tres veces ao día, as estrelas son branco de centenares de obxectivos de fotógrafos e cámaras de televisión.
As estrelas seguen considerando os vestidos longos de cola como un valor seguro. A australiana Cate Blanchett luciuno negro e de Armani Privei, a surafricana Charlize Theron amarelo de Dior e a británica Rachel Weisz verde esmeralda de Prada.
Como o negro, o branco está tamén moi presente, ás veces cun aire de vestido de noiva, como o romántico modelo de Rochas da actriz estadounidense Rooney Mara, o de encaixe de Dior do seu compatriota Emma Stone, ou o de Marchesa con apliques florais da chinesa Fan Bingbing. Tamén levaban vestidos inmaculados as actrices francesas Leila Bekhti (Giambattista Valli) e Cécile Cassel, quen optou por Alexandre Vauthier, un recentemente chegado á alta costura parisiense que tamén foi o elixido de Sophie Marceau, cuxo vestido cruzado de satén e seda abriuse inesperadamente, mostrando a súa roupa interior de cor carne.
As teas transparentes tiveron moito éxito, en particular entre as latinas, Eva Longoria e a transexual francobrasileña Stella Rocha. Esta optou por unha versión máis ousada de cor negra que non escondía practicamente nada. O voluminoso vestido de plumas de Elie Saab que luciu a actriz de Bollywood Sonam Kapoor tamén deu lugar a numerosos comentarios.
Coa excepción da actriz australiana Melissa George, que luciu un pantalón curto de Schiaparelli debaixo dun abrigo longo aberto a xogo, o vestido longo segue sendo a norma. «Está a volverse cada vez máis estandarizado», estimou Elise Bonaventura, fundadora da axencia Kilt, especializada en comunicación sobre moda, quen comparou Cannes coa cerimonia de entrega dos premios Óscar ou dos Globos de Ouro.
Moitas actrices son embaixadoras de grandes marcas, polo cal, «sempre reaparecen os mesmos nomes», lamentou. «ven cousas máis interesantes durante o photocall», a tradicional sesión de fotos dos equipos das películas, agrega. «Hai máis audacia», destaca, citando o vestido de Rodarche coa parte traseira transparente de Natalie Portman.
Este ano as escalinatas de Cannes víronse envoltas na polémica por impedir o acceso á alfombra vermella a mulleres que levaban zapatos baixos, a pesar de que as regras de Cannes, que esixen esmoquin e vestido de gala, non falan para nada de tacóns. O director artístico do festival Thierry Fremaux viuse obrigado a pedir desculpas e achacou esta prohibición a «un exceso de celo» dalgúns gardas de seguridade. Neste contexto, Inès da Fressange, que encarna a distinción parisiense, pisou a alfombra vermella cunhas finas sandalias douradas totalmente planas.