TVG emite ás 20.30 horas de hoxe un episodio dedicado ás distraccións, que son causa do 30 % dos accidentes mortais
27 may 2017 . Actualizado ás 10:07 h.«O teléfono móbil ten que ser un aliado. Non hai nada tan urxente que faga que se converta nun inimigo fatal». Esta frase do tenente coronel Francisco Javier Molano, xefe da Agrupación de Tráfico da Garda Civil de Galicia, resume o obxectivo dos responsables da seguridade viaria para advertir dos riscos do uso do móbil mentres se conduce un vehículo, a distracción que está a causar os maiores problemas para o tráfico. «Hai moi poucas cousas urxentes que nos obriguen a xogarnos a vida co teléfono», repetía Molano nunha entrevista en La Voz días antes do comezo dunha campaña da DXT sobre as distraccións na estrada.
E dos riscos do móbil volverá falar hoxe no episodio de Luz Verde dedicado ás distraccións que emite ás 20.30 horas a TVG. No programa producido por Voz Audiovisual ofrecerán tamén a súa versión a coordinadora da DXT en Galicia, María Victoria Gómez Dobarro, e a psicóloga Eva Muíño, especializada en seguridade viaria, que exporá as razóns que poden levar a un condutor a distraerse cando ten que prestar a máxima atención á estrada.
Luz Verde é un espazo protagonizado por gardas civís da Agrupación de Tráfico. De feito, as secuencias que se dramatizan en cada programa están baseadas en situacións reais que viviron os axentes a pé de estrada. Os axentes Héctor Teixeira, José Manuel Sixto, Juan Carlos R. Bello e Francisco Javier Illán darán conta cos seus testemuños dos riscos que advirten cos condutores que usan o móbil ao volante e explicarán de que forma interveñen.
As distraccións causan máis do 30 % dos accidentes mortais nas estradas. E o móbil é a que máis riscos provoca.