Alejandro Martínez: «A nosa estratexia é crear produto premium español»
TELEVISIÓN
Ademais de traballar con creadores de nivel, a cadea quere apostar a medio prazo por novos talentos
22 may 2017 . Actualizado ás 05:00 h.O modo de consumir entretemento está en plena transformación. Resulta evidente que cada vez son máis os telespectadores que se suman á nova fórmula de consumo en diferido ou a demanda. Con eles conviven aínda os que non din que non á tele tradicional. A pregunta é cando acabará ese proceso. Para Alejandro Martínez, director de contidos de Movistar +, «non vai rematar». Hai uns días estivo no Máster en Produción e Xestión Audiovisual (MPXA), un título propio da Universidade da Coruña que organiza a Fundación Santiago Rey Fernández-Latorre.
-Para sobrevivir ao cambio hai que entrar con forza nel. É un risco ou non?
-O que estamos a facer é liderar a transformación do cambio nos ámbitos de consumo da xente. Temos 3.700.000 fogares con televisión, o que representa ao redor de 1.100.000 de persoas. Tratamos de ofrecer alternativas como, por exemplo, Últimos sete días (Ou7D). As series ou o cine xa ven máis en diferido que no modo tradicional, pero moito máis. Iso estase acelerando. É verdade que aí temos un papel relevante. Ademais, a nosa estratexia é a de crear produto premium español por primeira vez. Ningunha canle de pagamento fíxoo antes. Estes contidos habitualmente eran norteamericanos ou anglosaxóns.
-Como o fan?
-Con entretemento a través da canle #0 e coa ficción por medio das series orixinais que empezaremos a emitir en setembro.
-Todo isto é tamén unha oportunidade para os creadores ou produtoras que hai no país.
-Creamos 1.500 postos de traballo directos no último ano desde a saída de #0. Estamos a traballar con xente de gran talento, actores de primeiro nivel, de Goya. A tele é un medio excepcional. Queremos facer cousas que entreteñan, pero que sexan de calidade e diferentes. É a aventura na que nos metemos e está a saír ben.
-Di que pode entreterse con calidade, todo este cambio é tamén a morte do telelixo?
-Non, creo que non. Hai xente para todo. Desde aqueles a os que lles gustan os grandes produtos de masas a outros que queren gozar de cousas especiais. Hai aqueles que optan pola tele de sempre e outros aos que lles gusta máis o cine. Hai que contar historias que importen á xente dun xeito próximo. Hai espazo para todos.
-Ofrecen un amplo abano de tarifas para gañar cota.
-Estamos a buscar que haxa unha oferta por cada tipo de usuario para que chegue o maior número de xente que poidamos REVISAR. A penetración é dun 33 % en España; en Portugal é dun 80 %. O percorrido é longo aínda. Ímolo facer nos anos que veñen, paso a paso. A xente está cambiando o modo de consumir. Estamos a velo, vai ser radical.
-Falaba do persoal co que traballan. Os noveis caben aí?
-Hai unha serie da que non podo falar, pero que está practicamente pechada que é dun creador novel. A idea é xerar ao principio proxectos con xente que está máis establecida á que atraemos desde a tele en aberto ou desde o cine á tele de pagamento, pero tamén a curto e medio prazo, incorporar talento novo ao proxecto.