A xerente do hospital de «Urxencia cero» dálle unha oportunidade ao amor
TELEVISIÓN
Ánxela Souto deixarase levar nunha inesperada situación no capítulo desta noite, ás 22.05 horas en TVG
27 mares 2016 . Actualizado ás 05:00 h.Os príncipes azuis están ás veces máis preto do que se cre e, o día menos pensado, preséntanse chamando á porta ou invitando a un café, como ocorrerá esta noite no novo capítulo de Urxencia cero, a serie de Voz Audiovisual que emite Televisión de Galicia (22.05 horas).
As historias sucédense no Francisco Balmis nesa trama de vidas cruzadas que acaban por confluír e, á fronte do hospital unha muller, Ánxela Souto, encárgase de que as cousas sigan o seu rumbo. Pero a vida persoal é outra cousa. Para alguén tan esixente como ela relacionarse cos demais resulta complicado e así se demostra na súa vida amorosa, que é practicamente inexistente. Polo menos ata hoxe. Unha inesperada situación fará que a estrita xerente lle brinde unha oportunidade ao amor.
Menos doce é o momento que atravesa a enfermeira Pili. Todo cirurxián, sanitario ou celador sabe que o seu traballo pode afectar á súa vida familiar, pero o que unha profesional con tantos anos de experiencia como Pili non sabía é que tamén pode suceder o contrario, que sexa a súa vida familiar a que altere por completo o seu traballo. O pouco exemplar comportamento do seu fillo é a causa da súa alteración. O mozo é detido por tráfico de drogas e a enfermeira, nun intento desesperado por endereitalo, porao a traballar na limpeza do hospital, ás ordes de Reme. Pero a situación complicarase ata tal punto que porá en perigo o seu traballo e ata a vida dun paciente.
Pola súa banda, o ex noivo de María volveu ao hospital cunha oferta moi cuestionable: el mesmo doaralle un ril á enferma se o seu pai lle paga 100.000 euros. Pero Xurxo sabe moi ben que para que un transplante en vivo sexa legal a doazón ten que ser altruísta, voluntaria e gratuíta. Pero o que máis preocupa ao novo doutor é que María, a pesar de todo, acabe por ceder ante a chantaxe. O seu traballo será agora intentar que esta non acepte o ofrecemento e pensar nunha alternativa para saber que facer no caso de que o seu intento fracase.
O interese das tramas de Urxencia cero crece unha semana máis polo desenvolvemento de historias e personaxes, o que xera gran debate e comentarios en redes sociais a través da páxina www.facebook.com/UrxenciaCero e da conta de twitter \