Mark Zuckerberg consegue graduarse en Harvard 12 anos despois de iniciar os seus estudos

Harvard decidiu perdoar a Mark Zuckerberg  e concederlle o título de informático a pesar de que o fundador de Facebook nunca finalizou os seus estudos. O multimillonario abandonou os seus estudos na prestixiosa Universidade hai doce anos para dedicar todos os seus esforzos ao desenvolvemento da súa exitosa rede social. 

Máis dunha década despois, a Universidade decidiu concederlle o título de graduado con certas vantaxes, xa que Zuckerberg non tivo que cursar as materias que quedaban pendentes para rematar a carreira. «Mamá, sempre che dixen que volvería para conseguir o meu título», publicaba un orgulloso Zuckerberg no seu perfil persoal de Facebook xunto cunha foto dos seus pais.

O millonario empresario non só conseguiu o seu título, senón que ademais tivo a honra de participar no acto pronunciando o discurso de apertura. «Cando remate este discurso será a primeira vez que remate algo aquí en Harvard», era a frase coa que comezaba a conferencia do informático, que lembrou ao longo das súas palabras todas as cousas que viviu durante os anos que pasou na universidade. 

No medio da súa andaina estudantil, a Zuckerberg ocorréuselle crear unha plataforma en Internet que servise como punto de encontro entre os estudantes da súa propia Universidade. Era o ano 2003, o momento no que os chats e os messengers como os de Microsoft e Yahoo convertíanse na ferramenta favorita dos usuarios para comunicarse a través de Internet. Neste mundo foi precisamente onde se sementou a primeira semente de Facebook. Chamábase Facemas e tan só durou activa durante unhas poucas horas no campus universitario. Nela podíanse consultar todas as fotografías e nomes dos estudantes de Harvard. Facemas converteuse nun problema para Zuckerberg. Os responsables da universidade pecharon inmediatamente o sitio e puxeron unha amoestación a Zuckerberg por utilizar o material sen permiso.

Pero o éxito conseguido nunhas poucas horas serviu a Zuckerberg como idea para o que poucos anos despois se convertería nun dos xigantes de Internet. Tan só un ano despois decidiu deixar os estudos e dedicarse enteiramente ao proxecto. Así nacía Thefacebook, pai do que hoxe é Facebook.

Só tres anos foron necesarios para conseguir que a idea despegase e convertésese nun fenómeno en todo o mundo. A empresa conta actualmente con máis de 50 000 servidores aos que acceden mensualmente 1.860 millóns de usuarios e actualmente conta con 36 filiais en diferentes países e obtén uns beneficios próximos aos 26.000 millóns de euros.

Non son poucos os méritos conseguidos por Zuckerberg , que se converteu nunha das figuras máis coñecidas e respectadas no mundo informático. Por iso, o reitor de Harvard decidiu saltarse algunhas regras e «convalidarle» todas as materias pendentes para conseguir que o creador de Facebook entre no cadro de alumnos destacados da entidade. 

---

---

---