Recentes casos de malos tratos a bebés e anciáns provocaron un clamor social no país
24 oct 2016 . Actualizado ás 05:00 h.O pasado 7 de setembro tres educadoras da gardería municipal de Roma O Nido nel Parco foron condenadas a penas de entre dúas e tres anos de cárcere por pegar aos bebés que tiñan ao seu cargo. Doce días despois, os carabinieri irrompían nun asilo da provincia de Salerno, no sur do país, para deter aos seus 18 traballadores, incluído o director, polos supostos abusos reiterados aos que sometían aos anciáns e enfermos mentais que vivían no centro. Estes dous episodios son os máis recentes na serie de malos tratos a nenos e a maiores en lugares onde en teoría deberían ser coidados e consentidos.
Impulsada polo gran clamor social que provocan estes casos, a Cámara dos Deputados italiana interveu o pasado mércores coa aprobación dun proxecto de lei que regula a instalación de cámaras de circuíto pechado nas garderías, asilos e residencias para diminuídos psíquicos para verificar os eventuais abusos. Apoiada por unha gran maioría (obtivo 279 votos a favor, 22 en contra e 69 abstencións), a iniciativa lexislativa pasa agora ao Senado.
Os lexisladores italianos acadaron un razoable equilibrio entre seguridade e privacidade. As imaxes deberán ser captadas cun sistema pechado e cifrado para evitar eventuais difusións malintencionadas e só poderá ter acceso a elas a Fiscalía, sempre que se sospeite que existe malos tratos. Aínda que algunhas asociacións de pais esixían que se permitise controlar o que facían os seus pequenos na gardería a través dunha cámara conectada a Internet, a lei rexeita esta posibilidade. Prevé en cambio a necesidade de chegar a un acordo cos traballadores e cos familiares das persoas asistidas antes de instalar o sistema de vixilancia, custeado por cada centro.
Unha vez que estea aprobada esta normativa na Cámara alta, Italia porase á cabeza dos países europeos, pois apenas hai lexislación sobre o uso de cámaras de seguridade en garderías, residencias para anciáns e centros para discapacitados. En España fálase da necesidade de contar cunha lei similar cada vez que salta a noticia dalgún episodio violento, pero non se pasa de aí.