Desde as nove e media da mañá ata as tres da tarde. Case seis horas de negociación entre os representantes do goberno universitario e os sindicatos, e con todo non deu tempo a negociar todas as prazas que a USC ten previsto ofertar para o próximo curso. Si se trataron as prazas de nova creación e abordáronse as reposicións, pero nin sequera deu tempo a mirar por amais as de renovación, que quedarán para unha reunión posterior.
Entre as de nova creación figuran dez de catedrático, dez de profesores titulares, catorce contratados doutores e dez de axudantes de doutor, ademais de 78 prazas temporais para profesores lectores, asociados, PACs e interinos. O asunto máis espiñento era o primeiro, o dos catedráticos, xa que os 150 profesores acreditados a cátedra que agardan unha praza desde hai anos consideran ridícula a oferta da USC en comparación coa que están facendo outras universidades, e por iso presentáronse ao comezo da reunión para esixir, non só unha convocatoria máis xenerosa, senón explicacións en torno ao criterio de distribución.
Ese asunto quedou sobre a mesa. Segundo informou onte o vicerreitor de Comunicación, Xosé Pereira, aprobáronse as dez prazas, pero non deu tempo a negociar a que departamentos destinábanse, un asunto sensible porque a todos lles afecta a falta de promoción que se padeceu nos últimos anos. De feito, os acreditados que onte se presentaron na reunión acusaron o equipo de goberno de «opacidade» na distribución das mesmas. Será noutra reunión na que se aborde a cuestión e páctese cos sindicatos a distribución das devanditas prazas.
Unha vez que se presente a oferta completa, os sindicatos estudarana e darán o seu parecer, polo que aínda quedan varias sesións coas súas correspondentes alegacións, ofertas e contraofertas antes de pechar un acordo que posteriormente deberán ratificar os órganos de goberno da Universidade.
122
Prazas novas
Foron presentadas onte na mesa aos sindicatos
59
Reposición
Profesores lectores, asociados, PACs e interinos
343
Renovación
Aínda non se debateron na mesa de contratación