Noriega adianta que a municipalización da ORA e o guindastre tratarase en 18 de maio «ou antes» se hai días dispoñibles

«Desa data non pasa». A data á que aludiu esta mañá o alcalde de Santiago, Martiño Noriega, é o 18 de maio, cando está fixada a celebración do pleno ordinario. Desa data non pasará o debate da municipalización da ORA e o guindastre na capital de Galicia, que só está á espera do informe de intervención como de secretaría, o último trámite antes de levar a pleno a proposta, informes que, segundo adiantou o rexedor, estará listos «en breve». O 18 de maio é, en todo caso, unha liña vermella. Porque de haber días dispoñibles para convocar a comisión e o pleno nun mes de maio con moitos festivos na capital de Galicia, a municipalización destes servizos sería tratada antes pola corporación.

Convencerá o PSOE para que dea o seu apoio? «Home, trouxemos ao alcalde de Valladolid para convencelo, se non o convence el...». Refírese o alcalde á charla que mantivo fai un par de días co seu homólogo vallisotelano, o socialista Óscar Ponte, que está a facer avanzar a remunicipalización do servizo de augas da súa cidade entre recursos xudiciais. «Que cadaquén se ubique onde queira ubicarse», resolveu Noriega.

O alcalde tamén se referiu ás críticas da oposición tras a reunión que mantivo onte no Ministerio de Fomento, que afirma que saíu de alí sen compromisos. «As xuntanzas son xuntanzas e delas saes con compromisos verbais que logo se substancian» apuntou Noriega, que lembrou que foi o que ocorreu cun convenio para a intermodal. Á oposición pediulle «ter unha posición de cidade» e que neste tipo de situacións «cumpriría entender que todos temos que remar» xuntos e non facer «declaracións nas que cargan contra o alcalde e, no caso do PP, cargan incluso contra un ministro da súa cor política». 

---

---

---