Marcou os dous goles do Santiago Futsal na pista do Cartaxena
28 abr 2017 . Actualizado ás 23:31 h.O Santiago Futsal finalizou a Liga cun empate na pista do Cartaxena: 2-2. Catela marcou os dous tantos do conxunto branco.
Aos oito minutos de xogo, despois de dúas boas intervencións de Chema Mella e Raúl, o Cartaxena inaugurou o marcador por medio de Juanpi, que resolveu unha xogada ensaiada nun tiro de falta indirecto.
Na recta final da primeira parte, Chema Mella evitou o segundo dos locais sobre a mesma liña de meta. A continuación, Álex Diz centrou e Catela bateu por alto ao meta Raúl e estableceu a igualada antes do descanso.
Nada máis iniciarse o segundo acto, Catela volveu marcar e adiantou aos galegos. Hugo Sánchez asistiu ao seu compañeiro para unha boa definición. Segundos despois, Dani Montes puido incrementar a renda visitante. No ecuador do segundo período, Asensio igualou a contenda para os de casa, que a nove para o final cometeron a súa quinta falta de equipo.
O cinco local arriscou un pouco máis en busca do gol da vitoria e a catro minutos para a conclusión do envite os xogadores brancos reclamaron unha man dentro da área tras un remate de Álex Diz. A falta de 81 segundos, o Cartaxena atacou sen éxito a defensa visitante con porteiro-xogador.