Arquivada a denuncia de «O Correo Galego» que pedía inhabilitar a Martiño Noriega
SANTIAGO
O alcalde de Santiago non cometeu delito ao publicar a débeda fiscal da editora porque non era secreto
26 abr 2017 . Actualizado ás 05:00 h.A sección sexta da Audiencia Provincial, con sede en Santiago, arquivou a denuncia presentada polo Correo Galego contra o alcalde da cidade, Martiño Noriega (Compostela Aberta), que expuña a súa inhabilitación por ter publicado nas súas contas de Facebook e Twitter, en agosto do 2016, datos da débeda da empresa xornalística con Facenda, que no momento de producirse estes feitos ascendía polo menos a 897.441 euros, dato que transcendera con anterioridade porque a Axencia Tributaria iniciara un procedemento de embargo por esa cantidade notificado a clientes da editora. Ademais, dita débeda foi divulgada por un medio dixital en setembro do 2015.
Un dos argumentos nos que se basea o auto do que é relator o maxistrado Jorge Cid Carballo é precisamente que a débeda do Correo Galego con Facenda non era un segredo e xa que logo, non cabe cualificar os feitos como un delito de revelación imputable a unha autoridade ou funcionario público ou a un profesional (artigos 417 e 199 do Código Penal). O auto alude tamén á propia natureza da información difundida, para abundar en que non se pode falar de segredo porque non se trata dun dato interno da propia empresa, senón «referente a unha débeda de natureza pública que a empresa denunciante mantiña coa Facenda Pública». A resolución da Audiencia, contra a que non cabe recurso, incide en que o segredo é incompatible coa difusión da información realizada pola administración acredora.
«Contexto de enfrontamento»
O relator Cid Carballo cita tamén os principios de publicidade e transparencia incorporados á administración tributaria, polos que esta fai públicos as listaxes de debedores. Así mesmo, o tribunal que preside Anxo Pantín enmarca os feitos no «contexto de enfrontamento» entre O Correo Galego e Martiño Noriega, e explicita que a publicación realizada polo alcalde estivo precedida dun artigo do diario no que este censuraba os investimentos publicitarios do goberno local en varias empresas de comunicación, á vez que lle reprochaba que non o fixese no xornal ou a radio do Correo Galego. A resposta de Noriega a este artigo é a publicación do dato da débeda da editora con Facenda, explicando que esta era a razón de non contratarlle publicidade institucional do Concello. O alcalde acompañou esta publicación en Facebook da reprodución do informe por el solicitado á Intervención municipal que, con data 24 de maio do 2016, conclúe que para poder contratar ou recibir subvencións requírese estar ao corrente das obrigacións tributarias e coa Seguridade Social.
«Non nos atopamos ante unha difusión espontánea dunha información relativa á empresa, senón que dita revelación enmárcase nunha resposta dada por un representante político ante a publicación dun artigo no que se censura o seu comportamento á hora de gastar o diñeiro público en publicidade institucional», argumenta a resolución xudicial, e matiza que a resposta de Noriega «puido ser excesiva e merecedora doutros reproches, pero non ten a relevancia suficiente para constituír un ilícito penal».
Así, a Audiencia asume os argumentos da Fiscalía e da representación procesual de Noriega, e revoga a resolución anterior do Xulgado de Instrución número 2 de Santiago, que nun auto do 23 de xaneiro desestimara a petición de sobresemento e arquivo, que agora si concede a instancia superior.