Os colexios de Xeve e Campañó e o IES Valle-Inclán, elixidos para representar á cidade
24 may 2017 . Actualizado ás 12:57 h.Un só instituto servirá de referencia para medir o nivel educativo en ensino Secundario tanto dos alumnos como dos propios centros de Pontevedra. O Valle-Inclán, situado en plena Alameda pontevedresa, será a vara de medir a calidade do ensino nos centros públicos do municipio, tras ser elixido seguindo criterios estatísticos similares aos que se empregan para elaborar o informe PISA para que os seus resultados se poidan extrapolar ao conxunto da poboación. No caso da educación Primaria, os colexios de Xeve e Campañó realizarán a función de medidores.
Aínda que os centros seleccionados foron avisados con preto dun mes de antelación, a Consellería de Educación evitou dar tanto as cifras de alumnos chamados a realizar os exames -cinco en total- como os nomes dos institutos e colexios. En parte, pola manifesta oposición de moitos pais que seguen rexeitando as probas a pesar de ter pasado de ser censales -é dicir, en todos os centros- a muestrales -só nos escollidos como representativos-. As ausencias nas aulas, a única forma de evitar as reválidas, ascenderon, de feito, ao corenta por cento en todo Galicia. E no Valle-Inclán, onde dos preto de cen alumnos que estaban convocados só apareceron uns corenta.
Os titores dos estudantes están divididos, iso está claro. Pero, que pensan os verdadeiros protagonistas, os alumnos? Para empezar, que os resultados non serán representativos de toda a comunidade escolar de Secundaria de Pontevedra. Así o ven, polo menos, os estudantes dunha das clases do instituto pontevedrés. Os adolescentes, de entre 16 e 17 anos saben para que serve a reválida? «Para valorar os coñecementos que temos da ESO», asegura Marta. Polo menos, en teoría porque na práctica non teñen tan claro que cumpra a súa función: «Non serven para avaliar o que sabemos porque moitas cousas que demos non as poñen», engade.
Por exemplo, as probabilidades en matemáticas. Non chegaron a eles no temario, o que, na súa opinión, poderían distorsionar as conclusións. «Hai cousas que non demos durante o curso, así que non tiñamos nin idea de como facelas, polo que tampouco reflicte o que sabemos, porque ao non dalo non o sabiamos», confirma Laura. E engade, como solución: «Se se repiten outra vez as probas que cada centro poña o que deron durante o curso».
Abren entón eles mesmos o debate que naceu coa propia proba: ten que avisarse e poder prepararse, ou non? «Non é un reflexo da educación en Pontevedra, nin do pau. Preguntan cousas moi doados e que non serven para nada. Están a obrigarnos a facer algo que non nos van dicir que vai pasar e só serve para ver. Pero só nolo fan a nós en Pontevedra? Non ten sentido», critica. «Que lles digan aos profesores o que ía entrar e que nolo ensinen», propón a moza que está á súa esquerda. «Pero é que así non sería unha proba do que sabes, senón do que preparaches», contéstalle Pedro. «Pero se non o demos, como o imos saber?», replícalle a súa compañeira. «Pois para saber se che decataches ou non, pero se non o deches vale», resolve o alumno louro.
Si coinciden todos, e de forma unánime noutros puntos: primeiro, que está ben que sexa de tipo test e non de respostas para desenvolver. Porque son máis doados? Rin. Respondida a pregunta. Segundo, en que ningún deles presentouse voluntariamente aos exames. «Perdemos tempo para preparar os exames que temos en xuño. Agora xuntáronllenos todos», resume outro alumno.
E terceiro, que ningún deles preparoullo a conciencia, aínda sabéndoo con antelación. Como non lles dixeron que entraba e que non e sabían que non contaba para nota, non se preocuparon demasiado. «A xente tomoullo de broma, como non contaba moito tomáronllo de broma», recoñece unha das alumnas. Tampouco tiñan pensado estudar pola tarde para os de Galego e Inglés -onte tocoulles Matemáticas, Lingua e Historia-. E cuarto e último, que se, aínda que non fóra a incluírse no seu expediente si fóra a ser analizado para facer un expediente do alumno para envialo despois, só a nivel informativo aos seus pais, a situación cambiaría. E poida que ata llo tomaron en serio.