Os alumnos que optan por sacarse o título á marxe dos centros oficiais son 181
16 sep 2015 . Actualizado ás 05:00 h.Case 10.000 adolescentes -9.942, para ser exactos- enchen desde onte as aulas dos diferentes centros de Educación Secundaria e Bacharelato da comarca. A gran maioría deles, 7.159, fixérono para cursar Ensino Secundario, e os 2.783 restantes, para ocupar as prazas de Bacharelato. Foron sentándose nos seus pupitres de forma graduada ao longo da mañá, en función do curso no que entrasen, e o goteo foi incesante durante toda a mañá.
Grupos de mozos concentrábanse ás portas dos institutos, disoltos só pola choiva e o vento, que foron facendo aparición ao longo da xornada. Tras as presentacións oficiais, comezarán as clases propiamente ditas.
Tras os cartafoles e os cadernos sentaranse un total de 5.213 estudantes só na cidade do Lérez, dos que 3.646 farano en Secundaria -2.544 en centros públicos, 921 en privados concertados, e 181 por libre-, e 1.386 acudirán a instalacións de Bacharelato da Xunta e outros 181 ás de entidades particulares.
Marín achegará 1.199 alumnos novos a estes ciclos lectivos, dos que 863 estudarán Secundaria -503 en institutos públicos e outros 360 con prazas concertadas-, e 336 de Bacharelato -dos que só 30 asistirá a centros privados-. Os institutos de Sanxenxo acollerán, pola súa banda, 808 alumnos entre os 604 de Secundaria -dos que 111 estudarán grazas a prazas concertadas-, e os 204 de Bacherelato.
Privados e públicos
Poio contará con 791 adolescentes menos fóra das aulas, xa que a elas regresaron 565 estudantes de Secundaria -387 a dependencias autonómicas, e 178 a particulares sen concerto co Executivo galego-. Outros 226 cursarán Bacharelato, moi igualados respecto ao tipo de instituto ao que acudirán, xa que mentres 126 farano en instalacións privadas non concertadas e 100, ás públicas.
Tamén Caldas de Reis supera os sete centenares de alumnos matriculados. Foron concretamente 731 os adolescentes que onte ingresaron nalgún dos seus centros: 250 para cursar o segundo ciclo, e 463 para o primeiro -dos que 144 fixérono en centros concertados-. Bueu conta con 544 estudantes de Secundaria e Bacharelato; Ponte Caldelas con 288, Vilaboa con 191, Moraña con 137, Barro con 114, Cuntis con 112, Portas con 110, e Cotobade con 81. A Lama non posúe, polo momento, ningún.