O compromiso de Augas de Galicia era restaurar a canle a finais deste mes
26 jul 2017 . Actualizado ás 05:00 h.«A finais deste mesmo mes acometeranse traballos de conservación e recuperación das marxes do río». Foi o compromiso que o pasado 11 de xullo trasladou o director de Augas de Galicia, Roberto Rodríguez, ao alcalde de Caldas de Reis, Juan Manuel Rey (PSOE), durante unha reunión en Santiago. No Concello están á espera de que se materialice unha actuación que viña reclamando desde hai meses.
«De momento non sabemos nada da data. Faremos xestións con Augas porque o mes vai acabar e non queremos que haxa máis atrasos», comentou o rexedor. Os traballos que se executarán no tramo urbano do río Umia contarán cun investimento de 25.000 euros e consistirán na retirada de especies invasoras, rózaa de herbáceas e a eliminación de natureza morta que interrompe o curso normal do río.
O goberno local subliñou en reiteradas ocasións que a limpeza do Umia é competencia do organismo de Medio Ambiente. Tras o encontro do 11 de xullo, o alcalde expresou a súa satisfacción pola consecución dos traballos, pero recalcou a «necesidade de que Augas de Galicia realice estas tarefas de forma periódica e regular para mellorar o estado do río e evitar asolagamentos». O malestar veciñal polo estado do Umia é grande.
Malestar en Cuntis polas cianobacterias
A situación do encoro da Baxe preocupa non só en Caldas de Reis, senón tamén nos outros dous municipios afectados, Cuntis e Moraña. No caso de Cuntis, o grupo Veciñanza anunciou onte que sacará a problemática das cianobacterias no pleno que se celebrará este xoves. Hai uns días, esta formación solicitara ao Concello de Cuntis que reclamase a Augas de Galicia o resultado do tratamento experimental con cortiza de eucalipto que se aplica á presa desde fai seis anos para minimizar a floración da alga Microcystis sp. O concelleiro Santiago Martínez fixo fincapé en que se trata dun problema de contaminación que pode chegar a ser grave. «Hai que poñerse serios. A situación empeza a ser preocupante, en especial nas aldeas de Vilabar e Hervés, na parroquia de Troáns. Na zona da Pontenova é un escándalo», apuntou o edil de Veciñanza.
De momento, o verde da auga non afectou ao sistema de depuración nin ao abastecemento en ningún dos tres municipios. O estado de alerta pola presenza de cianobacterias decretouse o pasado 6 de xullo. Polo momento detectouse a alga na presa, na cola da presa e tamén na captación de Segade, en Caldas. Os concellos temen que se as condicións meteorolóxicas son favorables -altas temperaturas e ausencia de choivas- a situación no encoro se vaia complicando a medida que se achega o final do verán. En Galicia só hai dous encoros en estado de alerta: A Baxe e Beche (Abegondo).