O edificio converterase nun gran colector cultural e veciñal
07 jul 2016 . Actualizado ás 05:00 h.O grupo de goberno local tiña claro que non podía deixar á súa sorte á antiga sede do Concello de Barro. Poucos meses despois da súa chegada ao Concello, anunciaron a idea de reconverter a vella casa consistorial -situada no centro de San Antoniño- nun centro cívico do cal carece o municipio. No principio do ano, aprobouse a súa reforma e estimouse que co comezo do verán, o emblemático edificio volvería abrir as súas portas. A falta dun par de detalles, así foi.
O interior do inmoble recibiu un lavado de cara importante. Puíuse o seu chan e baleirouse de vellos elementos como mesas e cadeiras. Unha das obras máis importantes foi a renovación total das fiestras en todo o edificio. «O principal problema dun complexo destas características é que colla humidade. Antes tiña ventás e marcos de madeira, pero agora contará cuns novos ventanais que o illarán perfectamente do exterior e poderemos seguir usándoo», afirma o alcalde de Barro.
Na planta principal do antigo concello tamén se realizou unha reforma dos baños, adaptándoos ás necesidades dun edificio actual, cos elementos necesarios para ser utilizados por usuarios que sufran algún tipo de discapacidade.
Ante a súa inminente reapertura -posiblemente nunhas semanas- só quedaría mellorar algún punto da instalación eléctrica e unha man de pintura á porta principal. Un par de detalles que o Concello agarda solucionar estes días vindeiros.
Finalmente, Barro contará cun espazo sociocultural que albergará exposicións, charlas, conferencias e mesmo locais para asociacións. Un servizo co que o municipio non contaba, e que se vía a obrigado a utilizar o ofrecido pola biblioteca, aínda que non era nin moito menos, debido ao seu pequeno tamaño, o máis adecuado para estas actividades.