Piden un ano de cárcere pola morte de fame e entre xurros dunha egua e o seu poldro
A Lama
A Fiscalía considera que os animais estaban «expostos a unhas condicións extremadamente duras»
26 jul 2017 . Actualizado ás 05:00 h.A Fiscalía de Pontevedra anunciou a petición dun ano de prisión e tres de inhabilitación para calquera profesión ou comercio que teña que ver con animais, incluído a posesión dos mesmos, para o dono dunha leira da Lama onde no principio do ano morreron unha egua e o seu poldro. Sentarase no banco como suposto autor dun delito de malos tratos animais. A este respecto, no escrito de acusación refírese que os equinos atoparon a morte cando estaban «encerrados nun cortello carente das mínimas condicións hixiénico sanitarias, con abundante esterco, auga e xurro».
Desde o ministerio público engaden que ambos os animais estaban nunhas dependencias que unicamente dispuñan dunha pequena abertura no teito. Deste xeito, estaban «expostos a unhas condicións extremadamente duras e na máis absoluta desatención, que lles xeraba continuo sufrimento e, ao final, a morte de ambos».
Este feito foi descuberto por axentes da Garda Civil cando a egua e o poldro levaban máis dunha semana mortos sendo localizados os seus cadáveres semienterrados entre os excrementos. Por aquel entón a Comandancia informou que o propietario, a preguntas dos axentes do Seprona, supostamente recoñeceu que faleceran por inanición.