O punto conflitivo pode ser unha mouteira no alto do Monte Castrove
03 feb 2015 . Actualizado ás 05:00 h.Nos últimos días, dous novos protagonistas apareceron no conflito polos lindes entre Pontevedra e Poio. E é que, segundo transcendeu onte, o Instituto Xeográfico Nacional invitou a representantes dos concellos de Barro e Meis á reunión que se programou para este xoves.
Ao parecer, a presenza destes concellos no encontro está relacionado coas dúbidas que existen con respecto a unha mouteira situada no alto do Monte Castrove, punto no que conflúen os catro concellos. «Ao parecer, non teñen claro un marco que está no alto do monte», sinalou o alcalde de Poio.
Luciano Sobral, en todo caso, recoñeceu onte que non ten moitas esperanzas depositadas na reunión que acollerá o xoves: «A verdade é que esperamos pouco». A pesar diso, desde o equipo de goberno de Poio presentarase unha alternativa coa idea de desbloquear o conflito dos lindes, «outra cousa é que se poida ter en conta».
Deste xeito, a alternativa que defenderá Poio fronte a Pontevedra supón ceder «moi pouquiño por parte nosa», de tal modo que, a grandes liñas, viría coincidir coas teses que, desde hai anos, veñen defendendo neste municipio pontevedrés. Así, explicou que, «tendo en conta que aí se construíu unha nova infraestrutura, como é a ponte das Correntes, como linde se podería tomar este punto concreto».
O establecemento desta ponte como límite entre Pontevedra e Poio suporía, entre outras cuestións, que o nó de Bombeiros, a cementeira ou a Comandancia da Garda Civil pertencerían xeograficamente ao segundo dos municipios.
En todo caso, Luciano Sobral, con certa dose de ironía, avogou porque, no caso de que non se poida acadar un acordo que satisfaga a todas as partes en conflito, sexan os técnicos do propio Instituto Xeográfico Nacional os que establezan os lindes definitivos, «se é que son capaces de facelo».
Cuestión de pontes
Á hora de establecer os límites entre Pontevedra e Poio, un e outro municipio basea as súas demandas en pontes. Desde a capital provincial deféndese o do ferrocarril, segundo documentos relativos ao deslinde de finais da década dos trinta. Polo seu lado, os seus interlocutores de Poio remóntanse ao deslinde de 1889 que fixa o límite na metade do Lérez ata a desembocadura do Rons, e de aí segue cara ao norte seguindo a canle deste río. Agora, a nova proposta do goberno de Poio aposta por situar o límite na ponte das Correntes: «A diferenza é moi pequena, apenas uns metros con respecto á ponte onde estaba antes». En xogo, a titularidade dunha trintena de hectáreas.