Enxeñería Agraria e Tecnoloxía dos Alimentos despuntan na listaxe de Shanghái
12 jul 2017 . Actualizado ás 05:00 h.Historicamente as universidades americanas dominaron as clasificacións das mellores institucións académicas de ensino superior do mundo. Con todo, as europeas van escalando posicións ano tras ano e cando se analizan resultados por áreas de coñecemento, resulta que Galicia, e mesmo Ourense, saen bastante ben paradas.
É o que ocorreu co Academic Ránking of World Universities (ARWU), máis coñecido como ránking de Shanghái. Considerada como a clasificación de universidades máis prestixiosa do mundo -é habitual que os políticos se refiran a el nos seus discursos oficiais- avalía as 500 mellores universidades do mundo de modo global, é dicir, con todas as súas titulacións e investigacións.
Agora, esa institución acaba de publicar unha clasificación de universidades en base aos campos de coñecemento, que establece cales son as mellores nas distintas áreas. Trátase dun punto de vista que achega novos matices porque fai que algunhas delas, independentemente da posición que ocupen no ránking global, destaquen nalgún campo do coñecemento.
E aí é onde brilla Ourense. A listaxe por disciplinas recolle cales son as 500 mellores universidades en cada campo seleccionado. Este ano, como novidade, incluíu os campos de Ciencia e Tecnoloxía dos Alimentos e Ciencias Agrícolas e a Universidade de Vigo entrou dentro das 500 mellores do mundo en seis disciplinas. Dous delas gardan moita relación co campus provincial e, máis en concreto, coa Facultade de Ciencias. Así, en Ciencias Agrícolas a institución académica do sur sitúase nos postos 301-400, mentres que en Tecnoloxía dos Alimentos está entre as posicións 51 e 75 do mundo, un resultado moito máis que positivo para un centro académico relativamente pequeno.
Exclusiva en Ourense
De feito, a situación obtida no campo dos alimientos resulta moi destacable, sendo a mellor posición lograda por calquera universidade galega en todas as disciplinas, tratándose, de feito, da única galega que se coa entre as cen mellores. No caso da Universidade de Vigo é a única área de coñecemento na que se coloca entre as duascentas mellores universidades do mundo. E en ambos os casos, a docencia e investigación relacionada con estas disciplinas é exclusiva, ou case, da Facultade de Ciencias de Ourense.
Binomio grao e máster
«Creemos que estes resultados responden ao bo binomio que consolidamos entre a docencia de grao e a de posgrao, xunto co alto nivel que temos en investigación dentro da Facultade de Ciencias», explica o decano do centro, Gil Garrote. Lembra que desde os anos 90 do século pasado impártense no campus provincial os estudos de Ciencia e Tecnoloxía dos Alimentos, exclusivos en Galicia, e de Enxeñería Agraria, mentres que Ciencias Ambientais comezou a impartirse a partir do exercicio do 2010, sen que existise ata ese momento en Galicia.
Respecto dos programas de posgrao que se ofertan no centro, explica o decano que «tras cursar un grao, os alumnos poden matricularse o Máster en Ciencia e Tecnoloxía Agroalimentaria e Ambiental, que ten xa mención cara á excelencia por parte do Ministerio de Educación e Ciencia, e do que saen gran cantidade de doutores e investigadores. Este máster está enfocado cara a investigacións relacionadas con eses graos e cos campos nos que a avaliación de ARWU situou moi ben á nosa universidade».
Investigación «de gran calidade» uno dos puntos fortes do centro ourensán
Destaca tamén Gil Garrote, decano da facultade de Ciencias do campus provincial, que no centro que dirixe desde hai case dous anos están operativos numerosos grupos de investigación «de gran calidade», relacionados coas dúas ramas mencionadas no ránking de Shanghái. «Estes grupos poden presumir de contar cunha dilatada traxectoria, capacidade e produción científica, sendo varios deles seleccionados pola Xunta de Galicia como grupos de referencia competitiva», advirte o decano, que menciona tamén a Agrupación de Grupos de Investigación, o Centro de Investigacións Agroambientais e Alimentarias, financiada pola Consellería de Ordenación Universitaria da Xunta de Galicia, «onde se atopan gran parte dos grupos de investigación relacionados con estas disciplinas, que consideramos son de importancia vital para Ourense e para Galicia».
Os bos resultados logrados na afamada clasificación supoñen unha lombeirada ao traballo que realizan os integrantes da Facultade de Ciencias, un centro que ata non hai demasiado tempo tivo problemas de alumnado, precisamente nos graos que agora son obxecto de recoñecemento. A Universidade de Vigo acordou blindar estes títulos contabilizando de forma conxunta os primeiros cursos de ambas as titulacións, dado que comparten algunhas materias.