O alcalde ourensán agarda dar unha «pronta solución» ás obras das Lagoas
OURENSE CIDADE
Os veciños piden na Subdelegación do Goberno que se adopten na zona medidas de seguridade «inaprazables»
28 jun 2017 . Actualizado ás 05:00 h.As posicións sobre a paralización das obras dunha urbanización no barrio das Lagoas seguen distantes. Os veciños manteñen moi activa a reivindicación. Despois de encher de pancartas a contorna da residencia universitaria e a fachada das obras na avenida Otero Pedrayo, onte presentaron por rexistro un escrito na Subdelegación do Goberno para que o alcalde se «tome en serio dunha vez por todas» as súas reivindicacións. No escrito piden que se adopten medidas de seguridade «inaprazables» e que se continúen as obras de inmediato.
O alcalde de Ourense, Jesús Vázquez, valorou onte as queixas dos veciños das Lagoas e da parroquia da Asunción. O rexedor popular considera que os afectados non coñecen en detalle como se atopa o procedemento e asegurou que dúas das tres fases de obras que están pendentes de executar poderían estar xa en marcha. «Con quen temos que traballar e coa xunta de compensación para dar unha pronta solución. Non vou a dicir máis», sinalou Jesús Vázquez, a preguntas dos xornalistas durante unha visita a unha infraestrutura escolar.
O alcalde de Ourense tamén quixo facer balance sobre os pasos dados para desbloquear este proxecto, que obrigou ao peche da residencia universitaria: «Había un conflito enorme. Se aperturou a residencia e agora hai pendente unha terceira fase que implica un aparcadoiro previsto desde hai xa tempo e cunha serie de consecuencias». En clave política, o rexedor popular tampouco desaproveitou a oportunidade para apuntar ao anterior goberno socialista: «Temos que resolver unha vez máis un problema de antes. Intentaremos facelo de boas maneiras e con boa vontade coa xunta de compensación».
Outra visión
A iniciativa privada que se atopa implicada neste proxecto sostén que a súa vontade é a de executar os traballos canto antes e sinala que se desde o Concello de Ourense danse os pasos oportunos estarían en condicións de retomar as obras ao longo do mes de xullo. «A paralización da urbanización é única e exclusivamente imputable ao Concello. Fai máis de sete meses que temos pendente de resolver un expediente para a concesión de accesos a esta rúa, sinalou un portavoz.