O ano pasado, dez internos aprobaron o exame teórico
13 jun 2017 . Actualizado ás 05:00 h.O programa de educación viaria que se desenvolve na prisión provincial de Pereiro de Aguiar é un dos máis solicitados polos internos. Leva xa seis fases no centro ourensán desde que a Secretaría Xeral de Institucións Penais implantouno no ano 2010. Eva Vázquez, traballadora social do cárcere de Pereiro, é a coordinadora deste programa, que implica a varias administracións e colectivos, como a DXT, a Asociación de Autoescolas e os psicotécnicos. Trece internos participaron na última edición do programa de universalización da seguridade viaria o ano pasado e dez deles conseguiron sacarse o permiso de conducir B.
O programa, explica Vázquez, ten dúas vertentes, un curso de sensibilización de vinte horas dirixido aos presos por delitos contra o tráfico, aínda que o poden facer todos os internos, e outra enfocado á obtención do permiso de conducir. E é que Institucións Penais comprobara no ano 2010 que o delito máis frecuente entre os relacionados coa seguridade viaria, nun 35 % dos casos, era o conducir sen vixencia ou obtención do permiso. «É un programa moi demandado. Eles veno como algo que necesitan e teñen motivación e esfórzanse por facelo», explica Eva Vázquez.
É un esforzo tanto académico -os trece alumnos do ano pasado, calcula a coordinadora, fixeron tres mil test- como económico, pois deben pagar as taxas como calquera. Algúns dos internos non poden permitirllo, no entanto, por cuestións de diñeiro. Pero unha vez que poden facelo, o nivel de éxito é alto. «Nas seis campañas no centro penitenciario, a porcentaxe de aprobados estivo por riba do 75 %», expón a coordinadora.
O procedemento é similar que para sacar o carné na rúa. Os participantes no programa sométense ao exame psicotécnico e pagan as taxas. O convenio coas autoescolas permítelles dar ata corenta horas, que se adoitan facer seguidas, explica Vázquez, e as tardes déixanse para practicar e corrixir os test. Ao termo do curso sobe persoal da Dirección Xeral de Tráfico á prisión a examinar aos alumnos.
Unha vez aprobada a parte teórica, os presos aproveitarán as situacións que lle permitan saír de prisión -permisos, terceiro grao ou liberdade- para facer as clases prácticas e sacar o carné. Por iso a contía da condena que queda por cumprir aos solicitantes é un criterio para seleccionar a quen participan no programa. Os responsables valoran que o solicitante vaia a obter a liberdade definitiva en dous anos, pois esa é a vixencia do exame teórico aprobado. Outro dos requisitos é que nunca teñan obtido o carné. Sorprende a cantidade de persoas que carecen do permiso a pesar de que teñan conducido sempre, observa a coordinadora do programa.
Eva Vázquez recibiu onte unha placa da DXT na Subdelegación do Goberno por este programa. A homenaxeada mostrouse agradecida polo recoñecemento institucional aínda que lembrou que neste labor están implicadas os demais compañeiros do centro penal, os funcionarios que trasladan aos internos para estas saídas, un educador social, ademais do persoal da DXT, como a coordinadora de Educación Viaria.
O ambiente na prisión de Pereiro é positivo para conseguir o obxectivo e para os internos estar matriculados neste programa supón tamén un reforzo por mellorar nos seus niveis escolares de lectura ou escritura. O subdelegado do Goberno, Roberto Castro, lembrou que o centro de Pereiro é pioneiro en programas de seguridade viaria.