En 1977 procedíase a reivindicar o patrimonio incautado tras a Guerra Civil
25 jul 2017 . Actualizado ás 05:00 h.Membros da agrupación local do PSOE e da UGT, a quen acompañaba o secretario xeral do partido en Ourense, Modesto Seara, procederon a ocupar a Casa da Vila de O Carballiño.
Os feitos acontecían na tarde de onte e os militantes presentáronse na localidade carballiñesa cun certificado do Rexistro da Propiedade no que constaba que a casa era da pertenza do partido e que fora entregada, no seu día, á Falanxe. Ata a data o edificio estaba destinado a almacén de obxectos vellos do Concello do Carballiño e da Irmandade de Labradores e Gandeiros.
Unha vez que se procedeu a ocupar o inmoble, unha casa de planta baixa, gardouse un minuto de silencio polos socialistas mortos. A continuación realizouse un inventario de todos os obxectos alí existentes, que procederán a ser retirados pola institución municipal e as entidades a quen correspondan. No lugar presentouse o alcalde, que mantivo un diálogo cordial cos ocupantes.
Unha vez materializada a acción, izáronse as bandeiras de UGT e Mocidades Socialistas e colocouse un letreiro coa inscrición «Casa do Pobo». O acto transcorreu con normalidade, sen ningún tipo de incidente.