O campo ourensán maniféstase na capital para reclamar axudas polas xeadas
24 may 2017 . Actualizado ás 05:00 h.O campo ourensán mobilizouse onte na capital da provincia para reclamar axudas directas polas xeadas que a finais do mes pasado arrasaron con gran parte da produción de viño e outros cultivos. Máis de medio milleiro de agricultores percorreron as rúas de Ourense, desde o pavillón dos Remedios ata a sede da Xunta na avenida da Habana para esixir o mesmo trato por parte da administración que o ano pasado recibiron os viticultores de Sober afectados a saraiba. É dicir, axudas directas de 7.000 euros por hectárea ata un máximo de 15.000 euros.
Máis que o importe, o que teñen claro é que necesitan axudas para sobrevivir este ano e non tirar a toalla. Expono así o pai de Daniel Fariñas, quen se fixo cargo dunha explotación de 33 hectáreas en Valdeorras: «Nós vivimos do viño, seis persoas da familia, e a xeada estragounos todo». No seu caso, tivo seguro pero deixou de renovalo porque, afirma, non lle pagaron 500.000 pesetas. A cuestión do seguro é unha das obxeccións que pon a Xunta para falar de axudas directas. Juan José Salgado, de Monterrei, apunta que non se contratan seguros porque «son caros e cubren pouco, non estipulan ben o prezo da uva».
Aos novos viticultores, un pau deste tipo é unha freada importante pola perda dos traballos realizados e da produción. Mario Yáñez, de Larouco, ten unha explotación de dez hectáreas despois de dez anos como viticultor en Valdeorras e calcula unhas perdas de 70.000 euros ao danarse o 95 % da súa produción. Ademais das axudas directas, como as que deu a Xunta á Ribeira Sacra, e aos créditos, cre importante que se reformen os seguros agrarios. «Pagan a uva godello á metade de prezo do mercado», apunta sobre las pólizas. «Van deixar que marchemos, dan ganas de emigrar, cando antes pensaba plantar máis cepas e comprar viñas. Vexo que hai vides que non rebrotarán», apostila Yáñez. Outro novo viticultor de Valdeorras, Óscar Losada, corrobora durante a manifestación o dano para quen están a empezar: «Acabei de instalarme con tres hectáreas na Rúa de Valdeorras. Fixen un investimento grande e agora nin enxertos nin colleita. A volver empezar de cero».
«O Ribeiro en pé. Loita polos teus dereitos, polas nosas cepas» era o lema da campaña dos viticultores desta comarca. Desde Beade chegou Lucita Pousa, viticultora a quen a xeada afectou, segundo calcula, ao 90 % dos 24.000 metros cadrados de viña. «Beade foi o máis afectado. Fixen unha poda despois da xeada. Vese un brote pero non sabemos se haberá viño, porque a seca afectou moito». Xulia Bande, ademais de , colleiteiraten unha empresa de servizo de mantemento de viñas con doce empregados no Ribeiro. «Houbo que volver a podar todo, pero a colleita perdeuse e moita xente depende exclusivamente disto. Ademais a xente parou os traballos que nos daban porque non ten con que pagar. Igual teño que botar á metade da plantilla por falta de carga de traballo», asegura a empresaria.
Ademais das vides, outras producións danáronse, como as de mel e castañas, ademais da forraxe en municipios como A Mezquita, A Gudiña, Viana e Vilariño. Por iso, uns sesenta agricultores e gandeiros chegados destes municipios participaron onte na manifestación de Ourense ao son dos tambores.
Reunión coa delegada territorial e solicitude de entrevista coa conselleira
Ante a sede administrativa da Xunta, os convocantes -Sindicato Labrego Galego, Unións Agrarias, Federación Rural Galega, asociacións de viticultores e produtores do Ribeiro, Monterrei, Ribeira Sacra e Valdeorras- reclamaron un apoio efectivo da administración autonómica ao medio rural. Solicitan que se cre un rexistro de afectados a través das Oficinas Agrarias Comarcais, as liñas de axudas directas por hectárea danada, a condonación das cotas satisfeitas á Seguridade Social polo menos durante seis meses e créditos para paliar danos económicos e necesidade de liquidez.
Tras ler o manifesto, solicitaron unha reunión coa delegada territorial da Xunta, Marisol Díaz Mouteira, que acababa de baixar para un minuto de silencio polo atentado de Manchester, que tamén gardaron os manifestantes. Segundo fontes da administración, Díaz transmitiulles o que está facendo a Consellería: que fixo unha avaliación dos danos e trasladouse ao ministerio e que están a intentar decretar liñas e medidas de apoio pero que as subvencións están condicionadas pola normativa europea. Se hai axudas públicas para contratar seguros agrarios, o que é subvencionable non é indemnizable, sostén a Xunta. Haberá que agardar para saber se o dano final á produción supera o 30 % do total anual. A Consellería de Medio Rural, engadiron, mobilizou 10 millóns de euros para a liquidez de explotacións e 4,7 para seguros agrarios. Díaz comprometeuse a xestionar unha entrevista con algún responsable da Consellería en Santiago.