Dous positivos en drogas de camioneiros nun mes alarman en medios oficiais
A Mezquita
Na cabina do último condutor denunciado, os gardas percibiron «un forte cheiro a marihuana»
28 abr 2017 . Actualizado ás 05:00 h.O segundo positivo en drogas dun camioneiro nun mes confirmou que o consumo de sustancias estupefacientes non deixan de gañar terreo, mesmo entre persoas que se arriscan a perder o seu posto de traballo, ou a ser sancionados por iso. As cifras que manexa Tráfico mostran que nos últimos anos han subido de forma moi rechamante as denuncias por condución baixo os efectos das drogas, mentres cae o número de infraccións por positivos en alcol, pero que entre os denunciados figuren condutores profesionais está a ser motivo de especial preocupación polo risco colectivo que xera un condutor dun vehículo pesado coas facultades mermadas polas sustancias estupefacientes.
O último caso detectado pola Garda Civil de Tráfico corresponde á tarde do mércores. Unha patrulla do destacamento de Verín detivo a marcha dun transporte especial nas inmediacións do túnel da Canda, no municipio da Mezquita. Trasladaba un camión de gran tonelaxe tipo dumper. Os axentes só pretendían comprobar o tacógrafo, pero o acusado, segundo información da Garda Civil, mostrouse nervioso. No habitáculo, ademais, percibiron «un forte cheiro a marihuana», polo que o invitaron a someterse ao test de drogas. Deu positivo en cannabis, polo que de forma inmediata se procedeu á inmovilización do coche, sen que o condutor R. C. A., de 28 anos, veciño da localidade vasca de Basauri, puidese continuar.
A sanción, unha vez confirmada polo laboratorio, é de mil euros e a perda de seis puntos do carné de conducir.
Este é o segundo caso do mes, pois o 12 foi detectado outro en Trasmiras, onde o condutor dun tráiler, de 43 anos, deu tamén positivo en cannabis.
No que vai de ano son cinco os camioneiros profesionais que foron denunciados por drogas. No 2016 foran vinte e sete, mentres que en 2015, antes de xeneralizarse este tipo de probas, foron catro os condutores que deron positivo nos test de detección de drogas.
Na cabina do último os gardas percibiron «un forte cheiro a marihuana»