En 1992 o congreso do Teatro Losada pechaba a integración de «centristas» e «populares»
20 jul 2017 . Actualizado ás 05:00 h.Os movementos internos e os posicionamentos das diferentes correntes existentes no PP tras a recente «integración» no seu seo dos Centristas quedaron onte resoltos coa celebración do noveno congreso provincial do partido. No Teatro Losada déronse cita máis de medio milleiro de compromisarios e a representación institucional foi ao máis alto nivel: o presidente do PP de Galicia e da Xunta, Manuel Fraga, o do Parlamento galego e fundador de Centristas de Galicia, Victorino Núñez, e seis conselleiros -os de Agricultura, Cultura, Traballo, Educación, Industria e Sanidade- déronse cita no teatro ourensán para asistir ao congreso provincial que selou a fusión entre populares e centristas. Desde o acordo de finais do pasado ano, a xestora que pilotou a integración foi liderada man a man entre José Luis Baltar (Centristas) e Tomás Pérez Vidal (PP).
Da cita de onte no Teatro Losada Baltar saíu proclamado presidente do PP ourensán, por unanimidade, e na súa intervención combinou a flexibilidade e apertura ao diálogo cunha considerable dose de firmeza -para todos aqueles que non garden a debida fidelidade ao partido-. Lembrou que «Roma non paga traidores e ou PP ignóravos» para asegurar que non permitirá deslealdades nin negociacións baixo presión. Denunciou a marxinación da provincia.