O pivote norteamericano cambia a Liga Endesa pola VTB United League rusa
22 jul 2017 . Actualizado ás 18:18 h.Tras callar un gran curso no Obradoiro e brillar cos San Antonio Spurs nas Ligas de Verán da NBA, o pivote estadounidense Shayne Whittington (2,08 metros e 26 anos) pon rumbo a Rusia para fichar polo BC Zenit San Petersburgo. O conxunto azul non só é un dos equipos máis destacados da VTB United League rusa, senón que ademais disputa a segunda competición continental a nivel de clubs, a Eurocup.
O norteamericano márchase do Obradoiro tras ter asinado un expediente sobresaliente de 11,7 puntos e 5,5 rebotes de media, sendo ademais o interior máis utilizado por Moncho Fernández da batería de pivotes que tiña á súa disposición (699 minutos repartidos en 31 partidos de liga regular).
No vestiario do Zenit, Whittington reencontrarase con dous coñecidos da Liga Endesa, que do mesmo xeito que el desembarcan este verán no equipo adestrado por Vasily Karasev. Trátase do seu compatriota, o escolta Kyle Kuric, ata esta tempada nas filas do Herbalife Gran Canaria, e do base arxentino Nicolás Laprovittola, que defendeu este ano a camiseta do Saski Baskonia.
Rosco Allen chega a Tenerife
Pola súa banda, o tamén exobradoirista Rosco Allen chegou finalmente a Tenerife, tras o seu paso polas Ligas de Verán da NBA cos Boston Celtics. A á-pivote húngaro (2,06 metros e 24 anos), nas súas primeiras palabras como aurinegro, afirmou estar «moi ansioso» por dar o seguinte paso na súa carreira profesional. «Vou intentar sumar no que faga falta para axudar ao equipo. Xogarei duro e intenso para contribuír a que o Tenerife gañe o maior número de partidos posibles», sentenciou o interior.
O adestrador axudante
Todos os interesados en asistir ao quinto clínic Desmontando ao adestrador axudante, que se celebrará o 29 e o 30 de xullo, aínda están a tempo de inscribirse, pois o prazo rematará o luns ás oito da tarde. Este clínic organizado polo Obradoiro é o único de España centrado na figura do técnico axudante e o éxito das anteriores edicións inclúe máis de 300 asistentes.