O mercante BBC Ontario transportábaas na súa cuberta desde Bilbao a Alexandría
24 jul 2017 . Actualizado ás 05:00 h.En principio nada facía predicir tantos quebradizos de cabeza polas pas de aeroxeradores que perdeu o BBC Ontario o 30 de xuño fronte a Viveiro . Supúñase que llas tragou o mar e, como están feitas de fibra e non son estancas, que quedarían no fondo e acabarían partidas pola ondada. Non só non foi así senón que, de momento, xa obrigaron a prohibir o fondeo de mercantes na área que teñen reservada en San Román, na bocana da ría viveirense. Vinte e catro días despois, Salvamento Marítimo segue buscándoas, agora cun sónar.
Rastrexando a área de ao redor de seis quilómetros cadrados onde se supón que poden estar as pas, Salvamento pretende determinar cantas hai e como están, así como cantas quedan das gaiolas metálicas.
Desde que o pasado día 10 afloraron dúas pas, Salvamento despregou ao remolcador Sar Gavia, co que cooperan, alternándose, as lanchas Salvamar Alioth e Salvamar Shaula. Ata o venres recuperara catro pas, que remolcou ao porto de Celeiro, onde as amarrou. Ten balizada unha quinta e cre que hai outra entre augas. Se se confirma que a sexta pa está localizada, aínda quedarían quince, porque o BBC Ontario perdeu vinte e unha, segundo a Capitanía Marítima de Burela . Cada pa mide corenta metros de lonxitude, está construída con fibra e as autoridades marítimas da Mariña descartan que supoñan un risco para a navegación. Razoan que, como o que afloran son as súas puntas e foron construídas con fibra, ao tocar co casco das embarcacións desprazaríanse.
O mercante BBC Ontario transportábaas na súa cuberta desde Bilbao a Alexandría.