O «Helimer 215» evacúa ao bordo da súa autonomía a un tripulante francés ferido
SOMOS MAR
De noite e ao límite da súa autonomía. O Helimer 215 realizou o xoves unha complicada operación para evacuar ao CHUAC a un francés accidentado a 160 millas (298 quilómetros) ao noroeste da Coruña. O helicóptero ten base en Santiago, pero desprazouse ata Alvedro para encher antes de iniciar o rescate. O ferido, un home de 75 anos que ía a bordo do iate francés Saudade, activou a radiobaliza ao sufrir un accidente que lle ocasionou varias fracturas que lle provocaban dificultade respiratoria e impedíanlle moverse.
Os gardacostas británicos recibiron o aviso e solicitaron axuda aos buques que navegaban pola zona. Respondeu o mercante Seatrade Rede, que estaba a 250 millas de Fisterra , en zona de responsabilidade británica aínda que máis preto de España que do Reino Unido, e que recolleu ao accidentado. A garda costeira de Gran Bretaña pediu tamén axuda a Salvamento para coordinar a evacuación do ferido desde o mercante, que se achegou a Galicia para quedar ao alcance da aeronave. Enviou ao avión Sasemar 102 e ao Helimer 215, que deixou no hospital ao francés onte á unha da madrugada.