O médico lucense Rafael de Vega , fusilado en 1936, será un dos reclusos lembrados
19 abr 2017 . Actualizado ás 13:20 h.O vello cárcere de Lugo dará a coñecer a súa «memoria histórica» cunha exposición na que se ofrecerán datos sobre os presos e presas que estiveron retidos neste centro penal, algúns deles á espera da morte por orde do réxime franquista. Haberá fotografías, textos, obxectos persoais e outros materiais gráficos. A mostra será inaugurada o próximo día 28 e completarase con intervencións nas celas a cargo de varios artistas.
Entre as historias que se contarán nesta exposición atópase a do médico lucense Rafael de Vega , que foi fusilado en 1936, despois de pasar cen días encarcerado na prisión lucense. Rafael Pérez, neto de Rafael de Vega , puxo en marcha a web www.rafaeldevega.é precisamente para dar a coñecer a historia do seu avó con diferente material. Nela conta que foi «un eminente médico que modernizou a sanidade en Lugo desde o seu prestixioso sanatorio particular e desde a dirección do Hospital Provincial, así como venerado benefactor dos pobres aos que atendía sen cobrar. En 1936 foi acusado pola envexa dos seus competidores profesionais nun escandaloso xuízo sumarísimo e como escarmento atemorizador da poboación ao tratarse da personalidade máis relevante e querida do bando republicano lucense. Foi fusilado na tapia do cemiterio de Lugo o 21 de outubro de 1936». Antes da súa morte, segundo relata o seu neto na web, sufriu todo tipo de humillacións e malos tratos no cárcere, onde quedou incomunicado.
Entre o valioso material ao que pode accederse desde a web hai fotografías e datos históricos, recortes de hemeroteca e ata a reprodución das cartas de despedida que, desde a prisión, enviou á súa familia días ou horas antes de morrer o que fora recoñecido como o mellor cirurxián de Galicia.