A provincia ten 14.900 lucenses máis inactivos e sen cotizar que traballando
28 abr 2017 . Actualizado ás 05:00 h.Se os datos de poboación publicados polo INE o pasado mércores non son moi halagüeños para o futuro da provincia, os coñecidos onte da Enquisa de Poboación Activa (EPA) tampouco auguran unha mellora económica de Lugo. Na provincia hai 144.100 persoas inactivas, a maioría, 93.000, son xubilados e pensionistas. Mentres que a cifra de lucenses cun posto de traballo no primeiro trimestre do 2017 era de 129.200. Pero se nos fixamos nos datos da EPA do cadro adxunto, das persoas con emprego, 32.700 lucenses superan os 55 anos, co que en pouco tempo irá crecendo a taxa de inactivos e baixará a de lucenses en idade de traballar.
Todo este panorama socioeconómico dado a coñecer onte polo Instituto Nacional de Estatística se xunta coa contestación que o Goberno ofreceu á deputada por Lugo do PSOE, Margarita Pérez Herráiz. Como dato máis rechamante que fai público o Goberno destaca que o 47,1% dos lucenses que están sen emprego non reciben unha prestación da Seguridade Social. Ou o que é o mesmo, 9.537 lucenses non reciben subsidio. Outro caso son as axudas autonómicas, como a Risga, ou axudas sociais dos concellos.
Hai 11.988 persoas apuntadas no paro que si reciben algunha prestación, sendo os tramos de idade entre 55 e 59 anos e 60 ou máis os colectivos máis numerosos que reciben diñeiro por desemprego.
Segundo os datos facilitados polo Goberno, a taxa media de cobertura de desemprego na provincia diminuíu case un 14% desde o ano 2011. Así, a taxa media anual de cobertura de desemprego en xaneiro do 2017 sitúase en 57,6% frontes ao 71,4% de parados da provincia que cobraban prestación por desemprego no ano 2011. O momento máis baixo dos últimos anos viviuse en maio do 2016, cunha taxa media de 53,6%. Este tipo de datos tamén inciden na recadación. Se hai máis parados, máis pensionistas, menos poboación activa e menos desempregados que non reciben prestacións, as cotizacións á Seguridade Social na provincia baixan. Así, segundo explica o Goberno, as cotizacións á Seguridade Social na provincia sufriron unha minoración de máis do 5% desde 2010 ata 2015, pasando de 560,3 millóns de euros a 530,4 millóns de euros.
Insostenible
Para a deputada socialista por Lugo as respostas do Goberno demostran «a pésima evolución dos datos de cobertura de desemprego e cotizacións á Seguridade Social na provincia». E máis se se ten en conta os datos da EPA, desde 2011 ao 2016, onde a taxa de paro na provincia de Lugo ascendeu do 12% ao 13,75% e a taxa de emprego diminuíu do 45,92% ao 43,52%. «Esta situación é moi difícil de soster, especialmente nunha provincia como Lugo que ten un nivel de renda inferior», explicou Margarita Pérez Herráiz.
9.537 lucenses
Sen prestación
A xaneiro do 2017, esta é a cifra de lucenses sen recibir diñeiro polo paro.
Do 71,4% ao 57,6%
Taxa media de cobertura
Desde o 2011 ao 2017 baixou a taxa media de cobertura por paro un 14%.
30 millóns menos
Baixan un 5% as cotizacións
No 2010 as cotizacións á Seguridade Social eran de 560 millóns. No 2015, 530.
13,75%
Aumenta a taxa de paro
Segundo os datos da EPA de xaneiro do 2011 a xaneiro 2016, aumentou de 12% ao 13,75%.