Multan en Guitiriz a un chofer por levar atún conxelado nunha furgoneta para paquetería
LUGO
Axentes de Tráfico do destacamento de Vilalba interceptaron onte en Guitiriz (Lugo) ao condutor dunha furgoneta que levaba 287 quilos de lombos de atún conxelado nunha furgoneta preparada para a repartición de paquetería -non adaptada para o transporte de peixe-, xunto a tres garrafas de 25 litros de verniz. Os túnidos estaban introducidos en caixas de porexpán nun vehículo que non é isotermo.
O condutor, un transportista autónomo, viaxaba desde a base que a empresa ten en Madrid ata Culleredo (A Coruña) para descargar o material. Os axentes denunciaron ao chofer por levar a mercancía nun vehículo non acondicionado e por non ter o permiso ADR, obrigatorio para transportar mercancías perigosas. A sanción interposta foi de 4.400 euros.
Dúas técnicas de Sanidade acudiron ao lugar para medir a temperatura e verificar se o peixe estaba a ser transportado fóra das marxes exixibles. Segundo as súas medicións, o atún conxelado viaxaba a -14 graos, cando a lexislación fixa que debe manterse a -18 graos. Debido á estreita marxe, a mercancía non foi incautada.