Máis de 50 familias queren praza para o curso que vén e non a van a ter
08 jul 2017 . Actualizado ás 05:00 h.A demanda de prazas de gardería en Monforte dispárase e a oferta leva anos estancada. O resultado destas dúas realidades é que o curso 2017-2018 marcará un déficit marca de prazas. Resulta difícil saber exactamente cantas familias vanse quedar sen un sitio para os seus fillos, pero só cos que nestes momentos xa están apuntados nas listas de espera das tres escolas infantís da localidade suman xa máis de medio centenar. Ningunha das tres escolas infantís existentes ten capacidade para tantos nenos, así que faría falta duplicar o espazo nalgunha delas ou construír unha nova para garantir a súa entrada a todos os que a reclaman.
A maior lista de espera é a da gardería municipal, que ten 41 prazas e oitenta solicitudes. A escola infantil San Vicente de Paúl, a antiga gardería de Caixa Galicia, dispón para o curso que vén de 36 prazas e nestes momentos ten 42 peticións de matrícula. Para rematar, a escola infantil Parruliños ten sitio para 41 pequenos en cada quenda. O de mañá está completo e o de tarde, moito menos demandado, aínda dispón dalgunhas vacantes. Neste centro non dispoñen dunha lista de espera propiamente dita, aínda que os seus responsables confirman que desde que encheron a cota da mañá xa rexeitaron diferentes solicitudes de matrícula máis ese mesmo horario.
A extensión do Bono Concilia deixará sen efecto a axuda anunciada polo Concello
O Concello de Monforte ten reservados 20.000 euros nos seus orzamentos deste ano para axudar a pagar aos pais que queden sen praza na gardería pública as matrículas dos seus fillos nalgún dos dous centros privados da cidade. Pero probablemente non chegará a gastar nin un só euro de todo este diñeiro.
A Xunta dispón desde hai anos do denominado Bono Concilia, unha subvención que ten o mesmo obxectivo que a anunciada agora polo Concello de Monforte. O que ocorre é que ata agora non todos os que tiña dereito a cobrala conseguían facelo. Os fondos repartíanse ata que o diñeiro consignado esgotábase. A partir dese punto, non cobraba ninguén máis. No caso de Monforte, no curso 2015-2016 quedaron sen cobrar ao redor de trinta familias, segundo a información que manexa o Concello. O curso pasado xa o cobraron as vinte e tres familias monfortinas que o pediron, segundo confirmou onte a Xunta. Pero o ano que vén o 100% dos solicitantes van recibir o diñeiro, ou iso é polo menos o que prometeu o presidente da Xunta, Alberto Núñez Feijoo nunha comparecencia parlamentaria o pasado mes de maio.
Así as cousas, se esta promesa se cumpre o Concello non pagará o seu bono a ninguén. Porque o alcalde sostén que non é legalmente posible que una mesma familia acumule dúas subvencións deste tipo. A non ser que as condicións que estableza o Concello para o pagamento deste bono -que están aínda por definir- sexan máis vantaxosas que as da Xunta. Nese caso, podería haber familias que opten por solicitar a axuda municipal e renunciar á da Xunta.
O PP reprocha a Tomei que se saque fotos en obras financiadas ao 90% pola Xunta
Ao Partido Popular non lle gustou a visita efectuada esta semana polo alcalde ás instalacións da gardería municipal. Tomei acudiu para presentar publicamente o final das reformas que levaron a cabo neste centro durante as última semanas, explicou canto custaran as obras e debullou punto por punto en que se gastou o diñeiro. A portavoz do PP de Monforte, Julia Rodríguez, asegura que ese proxecto foi financiado nun 90% pola Xunta.
A difusión que o Concello de Monforte deu a estas obras e á visita do alcalde é, pensan no PP, deixa clara a falta de ideas e iniciativas do alcalde de Monforte, ao que lle piden «máis traballo e menos fotografías». O PP sostén que a maior parte do financiamento destas reformas, que incluíron melloras no patio exterior e tamén a adquisición de distinto equipamento didáctico e mobiliario, procede dunha liña de axudas da Consellería de Política Social para a mellora de infraestruturas en escolas infantís, concedida que foi concedida previa solicitude do Concello.
Outra para este ano
O Partido Popular monfortino adianta tamén que o Concello ten solicitada nestes momentos outra axuda similar, pero de menor contía, para levar a cabo outras obras este ano na gardería. Segundo os seus datos, este novo proxecto suporía un investimento total de case 4.000 euros, para as que o Concello pide á Xunta que achega 3.600, o 90% do total.