As infantís do Ribeira Sacra disputan mañá o campionato galego
29 abr 2017 . Actualizado ás 05:00 h.Un ano máis, o equipo infantil do Ribeira Sacra disputa a fase final do campionato galego feminino. As xogadoras que prepara Verónica Contreras desprázanse mañá a terras coruñesas para intentar revalidar o título de campioas que acadaron a pasada tempada.
Ás novas promesas locais, o sorteo deparoulles un emparellamento co Emevé, polo que se disputará un derbi provincial que inicialmente se prevía para a final. As deportistas de Contreras encaran o choque con entusiasmo, con ganas e con posibilidades de gañalo, posto que na liga regular, da que foron campioas, xa derrotaron ás lucenses nunha ocasión.
A adestradora do Ribeira Sacra ten boas sensacións de cara a este envite. «O noso obxectivo é repetir o do ano pasado, aínda que somos conscientes de que non será doado, porque en fronte teremos a un opoñente complicado», sinala Verónica Contreras.
A preparadora peruana traballou todos os detalles nos adestramentos da semana -o último dirixiuno onte a última hora da tarde no pavillón da Pinguela- e apunta os factores que poden desequilibrar o partido a favor das súas. «O importante é que as miñas xogadoras teñan o seu día. Todo pasa por xogar con moita concentración, non fallar nos saques, que é nosa principal arma, e estar acertadas en recepción. Se conseguimos isto, superaremos a semifinal», engade Verónica Contreras.
Hai que destacar que a diferenza do que ocorre na fase final do campionato galego infantil masculino, na que se clasifican para o campionato de España os dous finalistas, no feminino é diferente. Para lograr o pasaporte para o torneo nacional, as deportistas de Verónica Contreras terán que gañar o campionato.
Os horarios
A fase final do torneo autonómico infantil feminino xógase mañá nas instalacións da Sacra Familia. Ao Ribeira Sacra tocaralle madrugar, posto que disputará a súa semifinal ante o Emevé ás dez da mañá. Dúas horas máis tarde entrarán en liza os equipos das Calasancias e o Xuvenil de Teis. Nesta segunda semifinal, as favoritas son as xogadoras coruñesas.
Ás catro e media da tarde xogarase o partido polo terceiro e cuarto posto, mentres que a final se disputará ás seis e media. A entrega de trofeos levará a cabo ás oito e media da tarde. Esta é a terceira tempada consecutiva na que o Ribeira Sacra disputa a fase final do campionato galego.
As persoal
As xogadoras que forman o persoal do Ribeira Sacra son Nerea González, María Rodríguez, Carolina Camiño, Raquel Rodríguez, Eva Falcón, Claudia Gómez, Silvia Díaz, Lucía Rodríguez, María Sáez, Estela Subiela e Lorena Díaz. Esta última non será da partida, posto que sufriu unha escordadura de nocello.
Hoxe, todo o equipo presenciará os partidos que disputarán os xogadores do Korbis.