Envorca e perde a súa carga en Monforte un camión que levaba estrutura metálicas
LEMOS
Ocorreu durante a noite do domingo ao luns na estrada de ligazón entre o corredor de Chantada e a N-120
25 abr 2017 . Actualizado ás 05:00 h.O envorco dun camión cargado de estruturas metálicas obrigou a cortar durante horas durante a madrugada do domingo ao luns uno dos dous carrís da estrada de ligazón entre o corredor de Chantada e a N-120, en Monforte.
O accidente produciuse preto da medianoite, cando o condutor dun camión articulado perdía o control do vehículo. O camión estaba a piques de chegar á N-120 cando se foi cara á súa dereita e acabou por envorcar na cuneta.
Transportaba estruturas metálicas enrejadas e de grandes dimensións e na súa caída, a carga saíuse do remolque e quedou esparexida na calzada, no carril dereito en sentido á N-120. A cabina sufriu importantes desfeitas a consecuencia do golpe, pero a pesar diso o camioneiro conseguiu saír do vehículo polo seu propio pé e só con algunhas contusións sen importancia aparente.
Ás cinco da mañá
Ao lugar acudiron, ademais da Garda Civil de tráfico os bombeiros de Monforte. Os axentes de tráfico regularon a circulación pola zona ata que ás cinco da mañá, un guindastre retirou o camión e trasladou a outro vehículo a carga que transportaba.