É unha titulación fundamental para as oposicións que prepara a Xunta
22 abr 2017 . Actualizado ás 05:00 h.A Consellería de Educación viuse obrigada a anular os cursos oficiais de lingua galega, os denominados Celga, que se ían celebrar nos próximos meses en Monforte, Sarria, O Carballiño, Verín e Xinzo de Limia. O problema non é a falta de alumnos, senón que non hai profesores para impartilos. Confirmouno recentemente a propia consellería nunha resolución que teñen publicada nas súas páxina web o instituto monfortino Río Cabe e doutros centros nos que se ían impartir estas clases. En Monforte, o BNG e Esperta anunciaron onte iniciativas para protestar ante a Xunta.
A convocatoria dos cursos Celga agora suspendidos foi anunciada pola Consellería de Educación o pasado 8 de marzo no Diario Oficial de Galicia. Ía haber cursos de nivel dous, tres ou catro en vinte e nove localidades distintas. O asignado a Monforte íase celebrar no instituto Río Cabe e era de nivel tres.
Máis alumnos que prazas
Tras a publicación dese anuncio abriuse o prazo para que os interesados apuntásense nos cursos que lles interesasen en función do seu nivel de aptitudes e da proximidade ao seu lugar de residencia. Para facer o de Monforte había 34 inscricións, catro máis que prazas dispoñibles. En Sarria, O Carballiño, Verín e Xinzo tamén estaban cubertos as cotas mínimos de matrícula esixidos para que se puidesen celebrar. Segundo a información difundida onte polo BNG de Monforte, noutros municipios, como O Barco, non haberá curso porque non se inscribiron suficientes alumnos.
Os alumnos que se apuntaron ao de Monforte teñen que buscar agora outro curso de nivel tres para asistir a clases. O máis próximo a Monforte é o de Vilalba. En toda a provincia de Ourense non se imparte ningún.
Os cursos Celga son a certificación oficial da que dispón a Xunta para validar o dominio da lingua galega, tamén para os opositores que aspiran a un posto de traballo na administración galega. Boa parte dos alumnos dos cursos que se celebrarán este ano necesitan o título para participar nas oposicións que prepara a Xunta, as primeiras masivas en anos.
Tanto Esperta Monforte como o BNG anunciaron onte que levarán este asunto ao pleno que celebra a corporación monfortina o luns. En Esperta Monforte lamenta que sexan os residentes nas principais cidades os únicos que parecen ter garantida a posibilidade de facer estes cursos. E no BNG instan o Concello a reclamar á Xunta que a Escola Oficial de Idiomas de Monforte inclúa o galego na nómina de idiomas que se poden estudar nela.
BNG e Esperta Monforte anuncian iniciativas para protestar pola supresión