A reorganización do ano pasado supuxo un respiro inesperado para o castigado persoal do taller de Renfe en Monforte. O futuro destas instalacións levaba tempo pendendo dun fío. No 2013 os traballadores denunciaran que nos plans de Integria, a división de mantemento e reparacións da empresa, estaba o peche de Monforte. A situación agora é máis tranquila, porque a reparación de amortecedores serviu para igualar a carga de traballo ao tamaño do persoal. Pero aínda así, o futuro do taller de Monforte segue sen estar despexado.
O persoal ferroviario de Monforte está en xeral moi envellecida, pero neste servizo probablemente máis. Hai máis de vinte e cinco anos que a empresa non incorpora persoal novo ao taller. O traballados máis novo ten nestes momentos 51 anos e hai seis aos que lles falta pouco para cumprir 60. Así as cousas, o taller pode ver reducida o seu persoal de forma significativa en moi poucos anos.
Un aforro de só o 10%
Podería pensarse que cos datos actuais de carga de traballo, a empresa irá cubrindo con novos traballadores as vacantes por xubilación, pero iso está por ver. A documentación coa que Renfe xustificou o peche de Venta de Baños non deixa moito lugar ao optimismo. Neses informes figura que á empresa a reparación dun amortecedor sáelle practicamente polo mesmo prezo que compralo novo. O aforro é de apenas un 10% do custo total. E Renfe está a empezar a probar amortecedores novos que non necesitan mantemento.