Ningún dos profesionais galegos relacionados futbolísticamente con Mánchester viuse involucrado na explosión. A familia de Pep Guardiola, si
24 may 2017 . Actualizado ás 05:00 h.A cidade de Mánchester é coñecida no mundo pola súa potencia industrial, por grupos musicais como Oasis ou os Smiths, pero sobre todo polos seus dous mediáticos equipos de futbol: o Manchester United e o Manchester City. O mundo do deporte onte quedou conmocionado tras o atentado.
Entre os membros da familia futbolística que acudiron ao evento musical onde se produciu o atentado estaba a de Pep Guardiola. A esposa do adestrador dos citizens e as súas dúas fillas estiveron presentes no concerto e saíron ilesas. O propio adestrador español publicou, despois do susto, unha mensaxe en Twitter no que expresaba a súa consternación: «Estou conmocionado. Non me podo crer o que sucedeu onte á noite. Os meus máis profundas condolencias ás familias e aos amigos das vítimas».
Entre a lexión española de Mánchester hai unha importante colonia galega. Sobre todo no City, onde David Fernández Miramontes, un ex dianteiro do Dépor, exerce como xefe de observadores sub 16. Cando explotou a bomba, estaba na cidade: «A verdade é que me decatei ao día seguinte. A noite do atentado só me estrañou escoitar a un helicóptero. Pola mañá mandei un wasap á miña familia e atopeime con máis efectivos de seguridade para acceder á cidade deportiva, pero non podo dicir nada máis, porque me pasei o día alí dentro».
Fernández Miramontes é o único desta colonia galega que estaba na cidade. Fran, o ex xogador do Dépor que traballa no corpo técnico das categorías inferiores do City, xa está de vacacións, así que viu as consecuencias do atentado pola televisión.
Tamén ten contrato co club de Guardiola Anxo Esmorís, un rapaz de Coristanco que chegou a Inglaterra de man de Fernández Miramontes, igual que o seu irmán Daniel, aínda que de momento non conseguiron progresar na estrutura celeste. Anxo foi cedido esta tempada ao Mallorca, co que está disputando o tramo final da tempada en Segunda División, en tanto que Daniel, tras pasar pola academia do City, foi fichado polo Vilarreal.
Tamén estaba lonxe Carlos Lalín, o fisioterapeuta que José Mourinho leva sempre consigo desde que o coñeceu no Real Madrid. Lalín naceu en Venezuela, aínda que a súa familia é galega. Estudou Inef na Coruña e desenvolveu técnicas de readaptación que o levaron ao Deportivo e posteriormente ao Real Madrid. Onte atopábase co resto do persoal do United en Suecia, preparándose para disputar a final da Europa League.
Outros futbolistas relacionados con Galicia, como Nolito, que foi fichado polo City tras o seu espectacular paso polo Celta , cuxos afeccionados aínda teñen presente o recente empate en Old Trafford, estaban tamén de vacacións lonxe do Reino Unido. O fútbol, esta vez, saíu ileso. E espera que Mánchester siga sendo coñecida pola maxia do balón e non polo horror da morte.