Polo menos once policías feridos durante unha violenta protesta en Nantes contra a Fronte Nacional de Le Pen
INTERNACIONAL
Oito persoas foron detidas polas forzas de seguridade ao termo dos enfrontamentos
26 feb 2017 . Actualizado ás 18:46 h.Polo menos once policías e xendarmes franceses resultaron feridos durante unha violenta protesta organizada o sábado en Nantes contra o partido de extrema dereita Fronte Nacional, liderado por Marine Le Pen, segundo confirmou o ministro do Interior francés, Bruno Lle Roux.
Oito persoas foron detidas polas forzas de seguridade ao termo dos enfrontamentos e catro delas foron interrogadas, de acordo co balance proporcionado polas autoridades.
Na manifestación participaron unhas 2.200 persoas, ao lema común de «O fascismo non pasará», das cales 200 encerelláronse nunha pelexa contra a Policía á que guindaron, segundo as forzas de seguridade, cócteles molotov e proxectís.
En total e segundo os axentes había unhas 800 persoas pertencentes a grupos anarquistas e de extrema esquerda.
Os manifestantes protestaban contra a celebración este domingo na cidade dunha mítin de Le Pen con vistas ás eleccións presidenciais en Francia, que comezarán o 23 de abril.
Agárdase que ao redor das 15.00 comece o discurso de Le Pen, favorita segundo as enquisas na primeira volta, aínda que perdería unha segunda rolda tanto contra o candidato de centrodereita, François Fillon, como contra o líder do movemento En Marcha, Emmanuel Macron.