David Costas Cordal: «Estou preparado para volver e competir seriamente por un posto»
BANCADA DE RÍO
O central considera que está maduro e feito como futbolista e que a súa hora no Celta chegou
21 jun 2017 . Actualizado ás 21:05 h.David Costas Cordal (Chapela, 1995) xa está de regreso en Vigo. Preparado e mentalizado para quedar no Celta e gañarse un posto no once inicial. Regresa da súa media tempada no Oviedo co depósito da confianza cheo e disposto a aproveitar a oportunidade de comezar de cero cun novo adestrador. Séntese máis maduro e máis feito para o fútbol profesional despois de debutar en Primeira da man de Luis Enrique. Non pensa nunha terceira cesión, pero non esconde que o Oviedo lle deixou un gran recordo.
-Seis meses de cesión perfectos no Oviedo.
-Foi unha media tempada moi boa. Desde que cheguei tiven a confianza do adestrador, xoguei todos os partidos nos que estiven dispoñible menos os dous primeiros e estou contento co meu rendemento alí. No colectivo non fomos capaces de conseguir o obxectivo.
-Atopando a súa vea goleadora con tres tantos.
-A verdade é que non conseguira ningún gol a nivel profesional, pero no Oviedo conseguín facer tres en seis meses. Todos foron de estratexia, dúas de falta e un de córner.
-Con respecto ao seu regreso de Mallorca, pódese dicir agora que David Costas está máis feito?
-Creo que cada ano que vai pasando estou a facerme máis como xogador, estou a crecer e creo que estou preparado para volver a Vigo e competir cos meus compañeiros seriamente por ser titular. Penso que podo xogar e facer as cousas ben.
-Mellor en Oviedo que nas Illas Baleares?
-Nos dous sitios estiven cómodo, estiven ben, pero en Oviedo puiden acabar a tempada a moi bo nivel e en Mallorca pasoume factura a lesión. Aquí conseguín render mellor e estou preparado para volver ao Celta .
«En Oviedo foi unha media tempada moi boa, estou contento co meu rendemento alí»
-Díxolle algo o Celta acerca do seu retorno?
-Polo momento non falei con ninguén, pero se que teño que presentarme o día 10 co resto dos meus compañeiros, aínda que acabei a liga máis tarde estou citado e alí estarei. Son xogador do Celta , o adestrador é novo e creo que oportunidades temos todos porque todos partimos de cero e eu síntome preparado para volver aquí.
-Como ve a competencia co resto dos centrais?
-Coñézoos a todos e son moi bos xogadores, pero agora mesmo estou convencido de que todos imos ter oportunidades e eu vou intentar aproveitar as miñas.
-Clave facer un bo papel no verán?
-O ter acabado máis tarde fai que non perdas tanto o nivel físico, preparareime algo antes de empezar e intentarei chegar a lume de biqueira á pretemporada.
-Sería unha decepción unha terceira cesión para vostede?
-A miña idea é quedar e ser importante aquí e se ao final teño que saír cedido de novo irei, pero teño moitas ganas de xogar aquí e demostrar que vallo para xogar no Celta .
-Como central, non como lateral dereito.
-De lateral só xoguei con Berizzo e no Oviedo tamén xoguei algún partido esporádico, pero síntome moito máis cómodo xogando polo centro.
-No caso de ter que saír de novo o Oviedo sería a primeira opción?
-Sei que están interesados en que volva alí, pero a miña primeira opción agora mesmo é quedar aquí e xogar aquí. Está claro que o Oviedo é un equipo a ter en conta, tratáronme moi ben e xa veremos que pasa.