A montaxe, no que o protagonista loce a camiseta, represéntase estes días en Madrid
18 jun 2017 . Actualizado ás 09:41 h.A camiseta do Celta aparecerá sobre as táboas dos Teatros Luchana ata finais do mes de xuño. O motivo é unha obra teatral dirixida por Antonio Hernández Centeo que, baixo o título do gol de Álex, reflexiona sobre a homofobia, especialmente en relación co mundo do fútbol. Protagonizada por Alejandro Albarracín e Pepe Lecer, este último actor dá vida a un xornalista afeccionado ao equipo e loce xa a elástica celeste no mesmo cartel promocional da montaxe.
«Escribín esta obra durante unha ruptura sentimental cunha persoa á que me unía o Celta , e quixen subir aos escenarios moitos dos temas que para min eran unha débeda pendente: o fútbol como protagonista, o desamor, os medos», analiza Hernández Centeo. O director pregúntase tamén «por que no mundo do fútbol existe unha barreira que capa a liberdade de amar libremente aos deportistas máis admirados», algo que trata de denunciar neste espectáculo.
Víctor Gutiérrez, o primeiro xogador de Rugby da selección española que se declarou publicamente gai, encabeza a lista de personaxes que dan a súa voz para apoiar a obra. O Pai Anxo, La Oreja de Van Gogh, Amaya Valdemoro, Miguel Diosdado, Álvaro Cervantes, Verónica Sánchez, Félix Gómez, Diana Palazón, Irene Montalá ou Raúl Tejón tamén se sumaron a un vídeo onde tamén se deixa ver a camiseta celeste.