A repetición tamén está máis penalizada na área científica
23 jul 2017 . Actualizado ás 05:00 h.Galicia é unha das comunidades coas carreiras universitarias máis baratas, e habitualmente cando se fala do prezo dun grao dise que un curso (60 créditos) custa 835 euros. Con todo, iso non é do todo certo. En Galicia, como no resto de España, é máis barato cursar unha carreira de letras que una de ciencias ou experimental, pola necesidade de contar con laboratorios e material específico; nese caso, o custo do ano escolar si é como mínimo de 835 euros (taxas e seguros, á parte). Pero se o alumno cursa, por exemplo, Dereito, o custo é moito menor: 591 euros por curso. Isto supón, tras catro anos de estudo, que unha carreira de ciencias sen repeticións sae en 3.340 euros, fronte aos 2.360 dunha de letras nas mesmas circunstancias.
Se o alumno ten que volver matricularse dalgunha materia, a diferenza multiplícase. Que se atragante unha materia durante varios anos pode supor un incremento substancial do prezo final. Por exemplo, se un estudante de Bioloxía da USC suspende en primeiro Biofísica (9 créditos) e vaina arrastrando ata o final, esa materia custaralle 358,11 euros; pero se no canto dese grao fai Turismo na UVigo e tropeza en (9 Derecho: Legislación Turística créditos), sacalo en cuarto valeralle 252,54 euros, é dicir, cen menos nunha soa materia. Claro que ningunha das dúas cifras, sendo altas, pódese comparar con Cataluña: aí repetir unha materia por cuarta vez nun carreira «cara» (Ciencias Biomédicas, por exemplo) é prohibitivo, 1.318 euros esa única materia.
O mesmo pasa cos másteres. Os habilitantes, é dicir, aqueles que son necesarios para poder exercer unha profesión (avogacía ou certas enxeñerías) teñen prezos diferentes en función da área da carreira.
Así, o máster da avogacía ou do profesorado sae nuns 1.200 euros, mentres que o necesario para ser enxeñeiro de camiños custa 1.800. E a diferenza mantense no resto dos másteres: 31 euros fronte a 21 por cada crédito, e adoitan ser 60; é dicir, de 1.200 a 1.800 euros segundo sexa unha especialización de letras ou ciencias.
Títulos e xestións
O Diario Oficial de Galicia (DOG) recolle a listaxe de prezos oficiais, que se manteñen conxelados. Nese sentido, calquera trámite é moito máis barato en Galicia que na maioría das comunidades. Cataluña, a autonomía coas taxas universitarias máis altas, duplica as de Galicia: pola tutoría dun doutoramento nas universidades galegas páganse 200 euros anuais, e nas catalás, algo máis de 400; a expedición do título de grao pasa de 123 a 218 euros; ou os gastos de secretaría, que son 30 euros aquí e 150 en Cataluña.